Ranicaj 22 śniežnia ŭ internacie niežyvym znajšli studenta Viciebskaj akademii vieterynarnaj miedycyny. Śmierć nastupiła ad pabojaŭ.
«Hruntujučysia na detalovaj acency sabranych u vyniku praviadzieńnia pieršapačatkovych śledčych dziejańniaŭ dokazaŭ, śledstvam pryniata rašeńnie pra zatrymańnie 21-hadovaha studenta toj ža VNU. Ustanoŭlena, što padazravany, jaki pražyvaŭ u adnym pakoi studenckaha internata z zabitym, u chodzie svarki, što ŭźnikła paśla sumiesnaha raśpivańnia śpirtnych napojaŭ, nanios jamu množnyja ŭdary rukami i nahami, ad jakich apošni pamior na miescy», — paviedamili ŭ Śledčym kamitecie.
24-hadovy Juryj, jakoha znajšli zabitym, navučaŭsia na 3 kursie. Pachodziŭ ź Pinska, dzie skončyŭ pierad hetym ahrarna-techničny kaledž pa śpiecyjalnaści zaatechnija.
Chłopiec byŭ adzinym dziciom u siamji, raskazała jaho znajomaja. Baćki raźvialisia i nie žyli razam, i ciapier maci zastałasia zusim adna. Dziaŭčyna nazyvaje jaho žyćciaradasnym čałaviekam, jakoha možna nazvać «dušoj kampanij». «Jon zaŭždy prychodziŭ na dapamohu ŭ roznych situacyjach».
U noč zdareńnia chłopcy zachodzili ŭ internet. Juryj byŭ na svajoj staroncy ŭ sacyjalnych sietkach u 0.38, jaho mierkavany zabojca — u 2.21. «Jany nadta nikoli blizka nie siabravali, prosta kantaktavali jak susiedzi pa pakoi», — adznačyła jaho znajomaja.
— Pravierka jašče praciahvajecca, vynikaŭ kankretnych niama. I davać kamientary niejkija ja nie ŭpaŭnavažany, — zajaviŭ načalnik adździeła vychavaŭčaj pracy Akademii vieterynarnaj miedycyny Ihar Murtazajeŭ.
U dačynieńni da padazravanaha Viciebskim haradskim adździełam Śledčaha kamiteta raspačata kryminalnaja sprava za zabojstva. Jon znachodzicca pad vartaj.
