Pošukam vinavatych u situacyi z pastaŭkami biełaruskaj pradukcyi zojmucca śledčyja orhany Biełarusi i Rasii. Adpaviednyja daručeńni byli dadzieny Alaksandram Łukašenkam i Uładzimiram Pucinym, paviedamiŭ siońnia žurnalistam pamočnik prezidenta Biełarusi Alaksandr Radźkoŭ.
«Treba naohuł nie dapuskać takich zdareńniaŭ, jakija adbylisia ciapier z našymi pradpryjemstvami miasa-małočnaj haliny. Jość ustanoŭka i Prezidenta Rasii (jon Bastrykinu (staršynia Śledčaha kamiteta Rasii Alaksandr Bastrykin) heta daručyŭ), i našaha Prezidenta (jon daručyŭ našamu Śledčamu kamitetu) pahladzieć, chto heta zadumaŭ, kamu heta vyhadna. Až da kryminalnych spraŭ», — zajaviŭ Alaksandr Radźkoŭ.
Pavodle jaho słoŭ, kali adpaviednaja tema abmiarkoŭvałasia prezidentami Biełarusi i Rasii ŭ Maskvie, to rasijski lidar adznačyŭ, što hetyja rašeńni prymalisia bieź jaho viedama. «Tamu zaprasili i kiraŭnika rasijskaj mytni, Dankvierta (kiraŭnik Raśsielhasnahlada Siarhiej Dankviert). I jany sprabavali apraŭdacca. Ale jak možna apraŭdacca Raśsielhasnahladu, kali pa niejkich parušeńniach vy adrazu zakryvajecie 21 pradpryjemstva, a potym pačynajecie praviarać… A tam, akazvajecca, narmalnaja vytvorčaść jeŭrapiejskaha ŭzroŭniu z usimi standartami, z dobraj pradukcyjaj. Buduć raźbiracca, až da kryminalnych spraŭ», — skazaŭ Radźkoŭ.
