Nam naradziŭsia Chrystos!
Ulubionyja Hospadam braty i siostry!
Darahija słužycieli Chrystovy!
Šanoŭnyja suajčyńniki!
Sardečna vitajem i vinšujem kožnaha z vas sa Śviatam Naradžeńnia Chrysta.
Heta vialiki dzień, bo adnojčy Anioł Božy abviaściŭ ź niabiosaŭ: «…siońnia naradziŭsia vam Zbaŭca, Jaki jość Chrystos Hospad, u horadzie Davida» (Łuk. 2:10-11). Na praciahu stahodździaŭ praroki pradkazvali Božaje zbaŭleńnie, ale jano stała mahčyma tolki z naradžeńniem Dziciaci.
I z taho času dla ludziej usiaho suśvietu, jakija žyvuć u ciemry hrachu, siarod žyćciovaha biazładździa i lutaj zimy, na niebaschile viečna źziaje Betlejemskaja zorka. Voś užo dźvie tysiačy hod niasie jana ludziam Ziamli supakoj i spadziavańnie na zbaŭleńnie ad hrachoŭnych pakutaŭ. I nadalej jana budzie śviacić kožnamu z žyvych, niby majak u raźjušanym mory.
Darahija siabry, abviaščajcie Dobruju viestku ludziam, jakija jašče nie spaznali zbaŭleńnie praz Chrysta! Maliciesia za svaich rodnych i siabroŭ, znajomych i nieznajomych, kab Hospad vyratavaŭ ich, kab ich žyćcio źmianiła nakirunak ź ciemry da śviatła i jany spaznali z usimi śviatymi vieličnuju luboŭ Božuju, i stali spadkajemcami Božaha vaładarstva dy ŭvajšli ŭ vialikuju siamju, jakaja zaviecca Carkvoju Isusa Chrysta.
Siońnia nad śvietam taksama hučać słovy Anioła: «Słava na vyšyniach Bohu, i na ziamli supakoj ludziam dobraj voli» (Łuk. 2:14). I siońnia Hospad, jaki źmiłavaŭsia da nas, naradžajecca ŭ sercach ludziej.Ź vialikaj radaściu budziem uznosić Jamu słavasłoŭje, chvału i pašanu, pryniasiom Hospadu dary našaha žyćcia. I niachaj množycca Jaho słava nie tolki na niebie, ale i ad kraju da kraju Ziamli.
Žadajem usim vam pośpiechaŭ u duchoŭnym i asabistym žyćci. Niachaj umacoŭvajecca vaša viera, a słužeńnie nabyvaje kaštoŭnaść u vačach Božych. Ciapier, kali śviet pakutuje ad vojnaŭ i realnaj pahrozy žyćcia ludziej, treba štodnia ŭzhadvać Božuju ciarplivaść. Trymajcie siabie ŭ pasłušenstvie Božamu słovu, bo vy – śviatło śvietu i sol ziamli.
Niachaj uračystaść prysutnaści Śviatoha Ducha achinaje zaŭsiody vašyja duch i dušu, a vyratavalnaje słova Jevanhiella štodnia idzie razam z vami pa składanych darohach žyćcia!
