Sud Leninskaha rajona Mahilova prysudziŭ da 14 hadoŭ pazbaŭleńnia voli z kanfiskacyjaj majomaści byłoha pieršaha namieśnika staršyni Škłoŭskaha rajvykankama Dźmitryja Miniankova, paviedamlaje telekanał ANT.
Pa materyjałach śledstva, čynoŭnik staŭ saŭdzielnikam afiory. Nie byŭšy ŭpaŭnavažanym, jon arhanizavaŭ adkryty konkurs na zakupku plemiannoj žyvioły dla patreb haspadarak. Pry hetym pieramožca tendaru byŭ viadomy zahadzia. Pa papiaredniaj zmovie za stanoŭčaje vyrašeńnie pytańnia čynoŭnik atrymaŭ chabar ad pryvatnaj kampanii z Mahilova ŭ pamiery zvyš 20 tysiač dalaraŭ. Stolki ž, pa dadzienych śledstva, firma abiacała vypłacić paźniej.
Jak raspavioŭ u efiry telekanała načalnik upraŭleńnia pa baraćbie z ekanamičnymi złačynstvami UUS Mahiloŭskaha abłvykankama Dźmitryj Ščadrakoŭ, supracoŭnikami UBEP vyjaŭlena, što ŭ 2010 hodzie pieršy namieśnik staršyni Škłoŭskaha rajvykankama, pieravyšajučy słužbovyja paŭnamoctvy, daŭ niezakonnyja ŭkazańni siami sielhaspradpryjemstvam rajona na zaklučeńnie kantraktaŭ z mahiloŭskaj kampanijaj «Ost-Impart «na nabyćcio bujnoj rahataj žyvioły ź Sierbii na ŭmovach 100-pracentnaj pieradapłaty. Pa kantraktach była pieraličanaja suma, ekvivalentnaja 5 miljonam dalaraŭ».
Paciarpiełym haspadarkam pakul viarnuli tolki niaznačnuju častku hrošaj. Čaćviora supracoŭnikaŭ mahiloŭskaj kampanii, jakaja vystupiła pasiarednikam, asudžanyja. Patencyjnyja pradaŭcy žyvioły znachodziacca ŭ vyšuku.
