Samaja niestabilnaja dzialanka hramadska-dziaržaŭnaha žyćcia – jaho bazis: ekanomika i finansy. Kraina chodzić, jak toj zašorany koń, pa kruzie: abiasceńvańnie rubla – denaminacyja, abiasceńvańnie – denaminacyja… Užo katory raz nastaje para drukavać 500-tysiačnyja i miljonnyja kupiury, bo kasiry ŭ kramach i bankach zadychajucca ad papiarovaj masy. Kraina nie vychodzić ź finansavaha kryzisu: 2008–2009, 2011, 2014… Teoryja Marksa ab cykličnych kryzisach da Biełarusi na stasujecca, bo ŭ nas nie cykličnaść, a piermanientnaść kryzisu. Musić, tamu, što ŭ nas i nie «pieršaja stadyja kamunizmu» i jašče niedaraźvity kapitalizm, kali ludzi (u pryvatnaści, u «maim» Hancavickim rajonie) nie mohuć vyžyć bieź źbiralnictva, kali staršynia rajvykankama publična narakaje, što sioleta byŭ słaby ŭradžaj dzikarosłych jahad i hryboŭ.

Da niestabilnaści finansava-ekanamičnaj sistemy dadajecca niestabilnaść uradaŭ. Tolki adzin Siarhiej Sidorski zasiedzieŭsia ŭ kreśle premjer-ministra bolš jak piać hadoŭ. Uładzimir Jarmošyn i Hienadź Navicki nie ŭsiedzieli ŭ tym kreśle i dvuch hadoŭ, Michaił Čyhir i Siarhiej Linh pasiadzieli troški bolš za dva, a Michaił Miaśnikovič nie dabyŭ da 4-hadovaha terminu litaralna niekalki dzion.

Kolki pratrymajecca na pasadzie premjer-ministra pryznačany ŭčora Andrej Kabiakoŭ? Zamiest adkazu na hetaje pytańnie, zadam inšaje: a čym hramadstvu, palityzavanaj jaho častcy zapomnilisia premjer-ministry Biełarusi? Chiba tolki Michaił Čyhir, finansist, ekanamist, – svajoj zajavaj ab sychodzie z pasady na znak niazhody z palitykaj pieršaha čynoŭnika dziaržavy.

Astatnija kiraŭniki ŭradaŭ Biełarusi nie zapomnilisia ničym, bo jany ŭ nas — čysta techničnyja vykanaŭcy. Jak i nibyta padnačalenyja im ministry. Pry panavańni KPSS rekamiendacyi niejkaha instruktara CK KPB mieli dla ministra vahu dyrektyvy. Pry hetym partyjnyja čynoŭniki nie nieśli nijakaj adkaznaści za svaje rekamiendacyi. Za niaŭdačy «adduvalisia» ŭrad, asobnyja ministry, načalniki ŭpraŭleńniaŭ i adździełaŭ u ministerstvach. Jany byli svajho rodu małankaadvodami. Hetak i ciapier: stratehičnyja rašeńni prymajucca nie ŭ Domie ŭrada, nie ŭ Nacyjanalnym banku, nie ŭ parłamiencie, a ŭ tym samym budynku, što i pry KPSS. Ministrami kiruje nie hetak premjer-ministr, jak čynoŭniki z taho samaha «Čyrvonaha doma», a «siłavyja» ministry padparadkavany niepasredna sami viedajecie kamu.

Pry takim paradku, kali niama sapraŭdnaha parłamienta, niama sapraŭdy adkaznaha pierad im uradu, niavažna, chto zajmaje pasadu premjer-ministra: ahranom Linh, inžynier-miechanik Jarmošyn, inžynier-budaŭnik Navicki, śpiecyjalist u halinie vakuumna-płaźmiennych technałohijaŭ Sidorski, inžynier-vadapravodčyk Miaśnikovič ci inžynier Kabiakoŭ. Skažuć: nieabaviazkova premjer-ministru być ekanamistam, finansistam, vuń Devid Kiemieran, Anhieła Mierkiel… Dyk tyja ž prajšli škołu publičnaj palityki, partyjnaj muštroŭki, tyja ž vyjšli navierch u vyniku žorstkaj kankurencyi, demakratyčnych praceduraŭ. Chto z premjeraŭ Biełarusi moža pachvalicca hetym?

Pry ciapierašnich paradkach niavažna, chto jakuju pasadu zajmaje. Hałoŭnaje – umieć być pasłuchmianym vykanaŭcam. Voś išła takaja sabie dyskusija ab prablemach adukacyi, ščyravali na hetaj dzialancy Anatol Tozik i Siarhiej Maskievič. I voś jany ŭžo ŭ adstaŭcy. Ciapier zamiest humanitaryja Tozika pytańni kultury, adukacyi, achovy zdaroŭja i sacyjalnaj śfiery budzie kuryravać va ŭradzie śpiecyjalist u halinie vadapravodaŭ i kanalizacyi Natalla Kačanava. Z kresła staršyni Navapołackaha harvykankama ŭ kresła vice-premjera – taki viertykalny ŭźlot dadziena ździejśnić nie kožnamu. Heta, musić, dziela «hiendaru»: treba ž, kab choć adna žančyna zajmała adkaznuju pasadu.

Što tyčycca novaha ministra adukacyi Michaiła Žuraŭkova, dyk jamu nie pazajzdrościš: i «haspadarka» zapuščanaja, i «śpiecyjalistaŭ» šmat, bo ŭ prablemach škoły ŭ nas «raźbirajucca», badaj, usie, pačynajučy z sami viedajecie z kaho.

Musić, prafiesar Žuraŭkoŭ padmanuŭsia na abiacanki čynoŭnikaŭ z «Čyrvonaha doma», jakija padbirali novych ministraŭ.

Nie pazajzdrościš i novamu pieršamu vice-premjeru Vasilu Maciušeŭskamu. Darma što jon prafiesijny ekanamist, kvalifikavany finansist. Vielmi chutka jon adčuje, chto sapraŭdy «raźbirajecca» ŭ nas u ekanomicy i finansach i kamu nakanavana rola małankaadvoda.

U hetych varunkach nielha bieź ironii nie adznačyć pryznačeńnie na pasadu kiraŭnika prezidenckaj administracyi niepataplalnaha Alaksandra Kosinca. Šeść hadoŭ kiravaŭ jon Viciebskaj vobłaściu. Kiraŭnika samaj datacyjnaj vobłaści, Piatra Rudnika, zvolnili z panižeńniem, kiraŭnika samaj nieŭradlivaj vobłaści zvolnili z pavyšeńniem. Ciapier jon budzie kiravać tymi čynoŭnikami, jakija de-fakta kirujuć uradam, kirujuć ministrami.

Piermanientnaha kryzisu nie pazbycca bieź pieramien va ŭsioj palityčnaj, haspadarčaj i kulturna-adukacyjnaj sistemie, biez kardynalnych pieramien u bazisie i nadbudovie. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?