Darahija siabry!
Chaču, kab najpierš mianie pačuli Mikoła Statkievič, Ihar Alinievič, Jaŭhien Vaśkovič i ŭsie źniavolenyja za svaje pierakanańni. Daj vam Boh chutkaha viartańnia da rodnych i blizkich!
My ličym čas hadami, i ŭ kožnym, jak u kavałačku burštynu, zastajucca dla viečnaści našy vialikija i małyja nabytki i straty.
U 2014-m adlacieli ŭ niabiesnuju Biełaruś dušy dvuch vydatnych tvorcaŭ – Ryhora Baradulina i Hienadzia Buraŭkina.
U 2014-m my adnojčy pračnulisia ŭ novaj hieapalityčnaj realnaści. Stałasia toje, što jašče ŭčora nie mahło pryśnicca i ŭ strašnym śnie: Rasieja zachapiła Krym, i na ziamlu blizkaj nam Ukrainy pryjšła vajna.
Ale ŭ praminułym hodzie ŭ nas z vami i ŭ cełaj krainy było i šmat dobraha, śvietłaha.
My kachali i naradžali dzietak, vandravali, budavali damy, pisali novyja knihi i pieśni…
A jašče — i heta hałoŭnaje — my stali macniej lubić svajo.
My zapisvalisia na kursy biełaruskaj movy. My nadziavali vyšyvanki i ładzili ŭ modnych kaviarniach i kłubach biełaruskija viečaryny. My ŭpryhožvali navahodnija jalinki ŭ svaich nacyjanalnych kolerach.
U 2014-m vialiki kniaź Alhierd narešcie ŭjechaŭ na kani ŭ Viciebsk, a na palach Aršanskaj i Ulskaj bitvaŭ byli ŭviekaviečanyja imiony i abliččy našych słavutych vajaroŭ.
Zdajecca, užo i ŭłada pačynaje razumieć, što mienavita svajo, kreŭnaje — mova, histaryčnaja pamiać, tradycyi — mohuć zachinuć ad navały lepiej za lubuju armiju.
Tady niachaj u novym hodzie Navahradak sustrenie bronzavaha karala Mindoŭha. Niachaj u Miensku źjavicca vulica Vasila Bykava. Niachaj u kožnym biełaruskim horadzie adčyniacca biełaruskija škoły. Niachaj stanie javaju mara pra nacyjanalny ŭniviersitet.
My — nie ŭskraina «russkoho mira». U nas jość svoj niepaŭtorny biełaruski śviet, jakuju treba źbierahčy i zrabić utulnym.
Davajcie padymiem u navahodniuju noč kielichi ź biełym, čyrvonym i biełym za naš biełaruski śviet! Za toje, kab my štodnia rabili jaho miežy šyrejšymi!
Z Novym hodam!
Na videa nižej — sardečnyja videavinšavańni ad viadomych ludziej krainy. Tajbaksior i śpiavak Vital Hurkoŭ, pravaabaronca, naminant na Nobieleŭskuju premiju Aleś Bialacki, niazłomnaja siamja Daškievičaŭ, hurt «Raźbitaje serca pacana», šoumen Hleb Łabadzienka, supracoŭniki adnoj z samych paśpiachovych kampanij śvietu Viber, mastak i muzyka Andruś Takindanh i «Art-Siadziba».
A Redakcyja «Našaj Nivy» dałučajecca da hetych ciopłych słovaŭ. Zdaroŭja vam, enierhii, pośpiechaŭ!
Chaj niahody zastajucca ŭ praminułym hodzie, a novy chaj budzie lepšym!
Chaj naša jeŭrapiejskaja kraina Biełaruś stanie ŭtulnym domam dla ŭsich nas!
Davajcie i sami rabić lepš i rabicca lepšymi ŭ vialikim dy małym!
Pavinšujcie siabroŭ, pavinšujcie blizkich i dalokich!
Žyvie Biełaruś! Usiaho dobraha! Z Novym 2015 hodam! Budźma!