Siońnia a 15-j hadzinie ŭ Ekanamičnym sudzie Minska raspačaŭsia praces nad kniharniaj «łohvinaŬ».
Pasiadžeńnie, padčas jakoha padatkovaja słužba vystaviła pretenzii ŭłaśniku kniharni Iharu Łohvinavu, doŭžyłasia kala 50 chvilin. Jano prachodziła ŭ kabiniecie sudździ Siarhieja Kułakoŭskaha, tamu źmiaścicca tam mahli tolki 2—3 čałavieki z prysutnych. Padtrymać ułaśnika kniharni pryjšli kala tryccaci čałaviek, siarod ich vydatny piśmieńnik Uładzimir Arłoŭ, pierakładčyk Lavon Barščeŭski, pradstaŭnik hramadskaj kampanii «Havary praŭdu» Andrej Dźmitryjeŭ.
U sudzie abvieščany pierapynak da piatnicy, 9 studzienia.
U sudzie razhladacca administratyŭnaja sprava pa niezakonnaj pradprymalnickaj dziejnaści kniharni «łohvinaŬ». Pa słovach Ihara Łohvinava, jamu pahražaje štraf u 500 bazavych vieličyń (90 miljonaŭ rubloŭ) z kanfiskacyjaj dachodu, atrymanaha ŭ vyniku takoj dziejnaści, albo biez kanfiskacyi, albo z pazbaŭleńniem prava zajmacca vyznačanaj dziejnaściu.
Jak pisałasia raniej, kultavy intelektualny adras biełaruskaj stalicy akazaŭsia pad pahrozaj źniknieńnia.
Pazapłanavaja padatkovaja pravierka pryjšła ŭ kniharniu «łohvinaŬ» u pačatku śniežnia. Pamiaškańnie apiačatali, a dakumientacyju ŭziali na vyvučeńnie. Pa vynikach pravierki kniharniu raśpiačatali. Ale vynieśli surovaje pakarańnie za pracu bieź licenzii Ministerstva infarmacyi. Pa vynikach pravierki kniharniu aštrafavali amal na 1 miljard rubloŭ.
