Fota: dw.de
Biełaruś moža zrabić pieršy krok da biaźvizavaha režymu, kali adpuścić palitźniavolenych u čas samitu Uschodniaha partniorstva, što adbudziecca ŭ mai ŭ Ryzie, patłumačyli pieršyja piersony Łatvii, dziaržavy-staršyni Jeŭrapiejskaha sajuzu ŭ pieršym paŭhodździ 2015 hoda. Pra heta paviedamlaje EUObserver.
Ministr zamiežnych spraŭ Łatvii Edhars Rynkievičs zajaviŭ pra «novyja pierśpiektyvy» u spravie biaźvizavaha režymu ź Biełaruśsiu. Pačatak «vizavaj libieralizacyi», śćviardžaje jon, budzie adrasavany i da prablem z hramadzianskimi svabodami.
Dziaržaŭny sakratar łatvijskaha Ministerstva zamiežnych spraŭ Andrejs Piłdziahovičs paćvierdziŭ: vyzvaleńnie palitviaźniaŭ źjaŭlajecca klučavym dla pazityŭnaha vyrašeńnia pa vizach. «My nie budziem pierahladać svaju pazicyju pa palitźniavolenych. Jany pavinny być vyzvalenyja, try čałavieki zaraz zastajucca za kratami (pavodle pravaabarončaha centru «Viasna» šaściora – NN). My budziem praciahvać cisnuć na Biełaruś pa ich vyzvaleńni, toje ž tyčycca pravoŭ mienšaściaŭ», – zajaviŭ Piłdziahovičs.
«Spadziajusia, my pabačym prahres da maja. Na jeŭrapiejskim uzroŭni ŭ nas było 20 hod nulavoha prahresu – heta horš za śpiačku»,
– dadaŭ jon.
Jon adznačyŭ, što ŭ suviazi z rasijskaj ahresijaj va Ŭkrainie Biełaruś stała bolš zacikaŭlenaj u lepšych adnosinach ź Jeŭropaj, asabliva ŭ ekanamičnaj kaapieracyi.
Biełaruś choča być pradstaŭlenaja na majskim samicie ŭ Ryzie na najvyšejšym uzroŭni, zajaviŭ Jurys Poikans, łatvijski dypłamat, adkazny za prahramu Uschodniaha partniorstva. Jon namiaknuŭ na mahčymuju prysutnaść na samicie Łukašenki. Pavodle jaho słoŭ, u paraŭnańni z adnosinami Biełaruś-ES dvuchhadovaj daŭniny, kantakty ź Biełaruśsiu stali «bolš intensiŭnymi».
