Sud Pieršamajskaha rajona Minska admoviŭ pravaabaroncy Alenie Tankačovaj u zadavalnieńni skarhi na rašeńnie rajonnaha ŭpraŭleńnia ŭnutranych spraŭ ab vysyłcy jaje ź Biełarusi. Takoje rašeńnie ahučyła 13 studzienia sudździa Natalla Pietuch. 

Nahadajem, 5 listapada minułaha hoda UUS Pieršamajskaha rajona pradpisała Tankačovaj na praciahu miesiaca pakinuć Biełaruś i zabaraniła joj naviedvać krainu ŭ najbližejšyja try hady. Padstavaj dla takoha rašeńnia stali zafiksavanyja videakamierami fakty niaznačnaha pieravyšeńnia chutkaści aŭtamabilem Tankačovaj. 

Pravaabaronca hetaje rašeńnie abskardziła. Praces abskardžvańnia praduhledžvaje prypynieńnie pradpisańnia ab vysyłcy na try miesiacy — pa miesiacu na abskardžańnie ŭ kožnaj z praduhledžanych instancyj. 12 śniežnia pravaabaroncy admovili ŭ zadavalnieńni skarhi ŭ pieršaj instancyi — HUUS Minharvykankama. 

Hramadzianka Rasii Alena Tankačova žyvie ŭ Biełarusi kala 30 hadoŭ. Na praciahu 20 hadoŭ Tankačova i Centr pravavoj transfarmacyi, jaki jana ŭznačalvaje, akazvajuć prafiesijnuju jurydyčnuju i ekśpiertnuju padtrymku niekamiercyjnym arhanizacyjam Biełarusi, a taksama ŭ situacyjach z parušeńniami pravoŭ čałavieka. 

Na papiarednim pasiadžeńni, 12 studzienia, Tankačova paprasiła sud admianić rašeńnie ab jaje vysyłcy z krainy jak pryniataje na padstavie ŭjaŭnych pahroz. Pavodle słoŭ pravaabaroncy, orhany ŭnutranych spraŭ zychodziać z taho, što jana raniej «kiravała srodkam pavyšanaj niebiaśpieki, parušyŭšy praviły darožnaha ruchu, što mahło pryvieści da pryčynieńnia hramadzianam cialesnaha paškodžańnia abo paciahnuć ich śmierć». «Ale ja za ŭsio žyćcio ni razu nie ŭčyniała dziejańniaŭ, jakija paciahnuli b pryčynieńnie ŭronu zdaroŭju hramadzian. Tamu abhruntavańnie orhanaŭ unutranych spraŭ zasnavana na ŭjaŭnaj pahrozie, jakuju nielha ličyć dakładnaj», — skazała Tankačova. 

Akramia taho, adznačyła Tankačova, u milicyi niama dakładnych dokazaŭ taho, što mienavita jana kiravała vadzicielem aŭtamabila, kali kamiery zafiksavali pieravyšeńnie chutkaści. 

Pravaabaronca taksama prasiła ŭličyć, što jaje «suviaź z Respublikaj Biełaruś nosić doŭhačasovy i ŭstojlivy charaktar» — tut u jaje jość pastajannaja praca i majomaść, a jaje dačka źjaŭlajecca hramadziankaj Biełarusi. Ni ŭ jakich inšych krainach Tankačova nie maje ni pracy, ni majomaści, ni žylla. 

Hramadskija aktyvisty sabrali 7 tysiač podpisaŭ pad prośbaj nie vysyłać Tankačovu z krainy. Pradstaŭniki hramadzianskaj supolnaści ličać dziejańni ŭład niepraparcyjanalnaj i palityčna matyvavanaj sankcyjaj, źviazanaj z prafiesijnaj dziejnaściu pravaabaroncy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?