Žychary vioski Turec-Bajary Maładziečanskaha rajona dasłali ŭ redakcyju tut.by fatahrafii, zasypanych ziamloj trupaŭ dzikoŭ. Historyja, jakaja atrymała praciah u sakaviku hetaha hoda, pačałasia jašče minułaj vosieńniu. Dzieci znajšli ŭ bałocie la raki dźvie tušy dzikoŭ i raskazali pra ŭbačanaje miascovamu palaŭničamu, raspaviadajuć žychary vioski.
Na miescy palaŭničy vyjaviŭ jašče 6 trupaŭ — usiaho 8. «U śviniej, vidać, z łyča išła kroŭ, — raspaviadajuć vidavočcy i miarkujuć, što śvińni byli zaražanyja afrykanskaj čumoj śviniej. — Palaŭničy pra ŭsio paviedamiŭ jehieru».
Na hetym situacyja, padobna, była vyčarpanaja. Miascovyja žychary chadzili pahladzieć miesca zahinułych žyvioł. «U minułym hodzie na tym miescy ničoha ŭžo nie było. My bačyli tolki vysiečanuju da miesca prasieku (mabyć, rasčyščali prajezd) i ślady «uazika». Dumali, što ŭsio ŭtylizavali», — raskazvajuć palaŭničyja.
U siaredzinie sakavika žychary vioski, špacyrujučy pa lesie, adčuli smurodny pach. I ŭ mietrach 500-600 ad miesca letašniaha vyjaŭleńnia trupaŭ i prykładna ŭ 800 mietrach ad vioski ŭbačyli ŭ jamie kuču tuš śviniej, prysypanych piaskom. Ź piasku tyrčali reštki, ich raściahvali lisy. Pra znachodku paviedamili ŭ inśpiekcyju pa achovie žyviolnaha śvietu, raspaviadajuć miascovyja.
Paśla taho, jak vypadak z trupami ŭspłyŭ paŭtorna, na miesca pryjazdžali pradstaŭniki lashasa. «Potym — inśpiekcyja pa achovie žyviolnaha śvietu, i praz tydni try — delehacyja ź siami mašyn: vieterynary i supracoŭniki Hienieralnaj prakuratury», — raspaviadaje žychar vioski Turec-Bajary. A niadaŭna pa vioscy stali chadzić vieterynary, praviarać chatniuju žyviołu.
Bolš za ŭsio ludziej niepakoić toje, što niechta chacieŭ schavać letašni incydent i ŭtaić mahčymuju krynicu zarazy. «Inakš navošta było adciahvać trupy na takuju adlehłaść i zasypać piaskom», — dziviacca miascovyja.
Prakuror Maładziečanskaha rajona Uładzimir Duboŭski raspavioŭ, što pa fakcie viadziecca papiaredniaja pravierka, pra vysnovy pakul kazać rana.
