Na mierapryjemstvy ŭ miežach mižnarodnaj akcyi «Noč muziejaŭ» u Nacyjanalny mastacki muziej Biełarusi (NMM) zmohuć trapić tolki 4 tysiačy čałaviek. Muziej pryniaŭ rašeńnie abmiežavać kolkaść naviednikaŭ u hety dzień u suviazi z budaŭnictvam muziejnaha kvartała, paviedamiŭ na pres-kanfierencyi 13 maja dyrektar NMM Uładzimir Prakapcoŭ.
Pavodle jaho słoŭ, u minułyja hady roznyja akcyi ŭ «Noč muziejaŭ» pravodzilisia jak unutry mastackaha muzieja, tak i va ŭnutranym dvoryku. Adnak zaraz na miescy hetaha dvoryka vykapany katłavan pad fundamient budučych budynkaŭ muziejnaha kvartała.
«My pradadzim kala 4 tysiač kvitkoŭ. Na siońnia pradali kala tysiačy. Chto kupiŭ hetyja kvitki, toj u muziej i ŭvojdzie», — skazaŭ Prakapcoŭ. Jon dadaŭ, što naviednikaŭ buduć prapuskać u niekalki patokaŭ — dvojčy pa 700 i 1.300 čałaviek.
«My pryniali hetaje rašeńnie z metaj biaśpieki, a taksama, kab navied́nikam było kamfortna, — rastłumačyŭ dyrektar muzieja. — U minułyja hady było zanadta šmat ludziej. My nie honimsia za kolkaściu naviedvalnikaŭ, my na hetym [na «Nočy muziejaŭ»] nie starajemsia zarabić niejkuju zvyšnormu hrošaj. My prosta chočam pakazać svaje mastackija, interaktyŭnyja, muzyčnyja prahramy. Kab ludzi, jakija da nas pryjduć ź dziećmi, pažyłyja ludzi mahli adčuvać siabie kamfortna, adnosna svabodna, kab my mahli ŭsio kantralavać».
Sioleta Nacyjanalny mastacki muziej padrychtavaŭ dla naviednikaŭ «Cichuju noč», jakaja pačniecca 16 maja ŭ 19.00 i «budzie doŭžycca da ranicy, kali spatrebicca», zaznačyŭ Prakapcoŭ.
Tak, na placoŭcy pierad muziejem minčan i haściej stalicy čakajuć muzyčnyja i teatralnyja vystupleńni, taksama budzie dziejničać fotazona.
Pakaz karotkamietražnych niamych filmaŭ pačatku XX stahodździa z fondaŭ Muzieja historyi biełaruskaha kino projdzie ŭ art-kafe muzieja. U halerei na druhim paviersie naviedniki zmohuć ubačyć vystavačny prajekt Biełaruskaha sajuza dyzajnieraŭ «PaStułat».
U dźviuch ekspazicyjnych załach ruskaha mastactva na druhim paviersie muzieja raźmieścicca vystava tekstylnych skulptur «Śniežnaje leta». Jašče ŭ troch załach raźmieściacca «Pakoj, jaki šepča» z «karcinami, jakija razmaŭlajuć, «Pakoj cišyni» z ekspazicyjaj fłuarescentnaha i psichadeličnaha mastactva, a taksama interaktyŭnaja placoŭka «Anatomija pačućciaŭ».
U novym korpusie-prybudovie (biełyja zały) naviednikaŭ čakajuć mnostva interaktyŭnych zon i prahram, muzyčnyja, teatralnyja i chareahrafičnyja vystupleńni.
«Prahrama cikavaja, my zadziejničali ŭsie mahčymaści svaje i našych kaleh — mastakoŭ, dyzajnieraŭ, muzykantaŭ i hetak dalej», — zaznačyŭ Prakapcoŭ.
Dyrektar NMM źviarnuŭ uvahu na toje, što prachod na vystavu vynachodstvaŭ Leanarda da Vinčy na pieršym paviersie muzieja budzie ažyćciaŭlacca pa asobnych kvitkach.
