Adziny šlach dla raźvićcia ekanomiki Biełarusi — šyrokaja kaapieracyja, ubudoŭvańnie ŭ suśvietnyja karparacyi. Takoje mierkavańnie vykazaŭ na pasiadžeńni kruhłaha stała «Stan i pierśpiektyvy niamiecka-biełaruskaj pramysłovaj kaapieracyi ŭ kantekście JEAES» 14 maja ŭ Minsku hanarovy staršynia praŭleńnia Biźnies-sajuza pradprymalnikaŭ i najmalnikaŭ imia prafiesara Kuniaŭskaha Hieorhij Badziej. 

«Kali my budziem praciahvać zachoŭvać naš patencyjał u pramysłovaści i nie budziem pierabudoŭvać našu ekanomiku, to i dalej budziem u kryzisie. Adziny vychad — šyrokaja kaapieracyja i ŭbudoŭvańnie ŭ suśvietnyja karparacyi. Siońnia možna pryhoža havaryć pra ekspart inavacyjnaj składanatechničnaj pradukcyi, moža być, u budučym my da hetaha i pryjdziem. Ale treba pačynać z pastavak detalaŭ, vuzłoŭ dla, naprykład, pramysłovaści Hiermanii, jakaja maje vydatnyja mahčymaści zborki i realizacyi», — ličyć Badziej. 

Jon adznačyŭ, što heta moža vyrašyć prablemu realizacyi biełaruskaj pradukcyi i biadotnaha stanu finansaŭ pradpryjemstvaŭ. «Pry ciapierašniaj padatkovaj i fiskalnaj palitycy našy pradpryjemstvy, jakija majuć 0—5% rentabielnaści, nie majuć pierśpiektyŭ stvareńnia narmalnaj vytvorčaści z tym, kab vychodzić z zavieršanaj pradukcyjaj na źniešnija rynki», — adznačyŭ hanarovy kiraŭnik biźnies-sajuza. 

Pavodle jaho mierkavańnia, «mienavita kaapieracyja źjaŭlajecca tym instrumientam, jaki dazvalaje nie tolki znajści novyja rynki zbytu, zahruzić vytvorčyja mahutnaści, ale i źnizić vydatki vytvorčaści pradukcyi, što dazvolić pavysić kankurentazdolnaść biełaruskaj pradukcyi i vychodzić na suśvietnyja rynki». 

Siarod prablem u raźvićci kaapieracyi jon nazvaŭ adsutnaść va ŭładzie razumieńnia, što Biełarusi nie treba zachoŭvać niekankurentazdolnuju vytvorčaść. «Nam treba źmianiać svajo abličča, treba pierabudoŭvać vytvorčaść, jak heta zroblena ŭ Hiermanii, u jakoj na kanviejer iduć kamplektujučyja ad pradpryjemstvaŭ-kłastaraŭ. Heta vuzkaśpiecyjalizavanyja, vysokadachodnyja pradpryjemstvy, jakija zabiaśpiečvajuć nizki sabiekošt i vysokuju jakaść. Tak atrymlivajecca tannaja pradukcyja, jakasnaja, kankurentazdolnaja», — adznačyŭ ekśpiert. Jon ličyć, što Biełarusi treba adychodzić ad struktury pramysłovaści, stvoranaj jašče ŭ SSSR pa pryncypie kambinataŭ. «Kali my heta budziem zachoŭvać, to nikoli nie dasiahniem kankurentazdolnaści», — ličyć Badziej. 

Jon taksama adznačyŭ, što važnaje značeńnie maje techničny ŭzrovień vytvorčaści. Pryvioŭ prykład, kali niamieckija kampanii prapanavali vyrablać vuzły i detali ŭ Biełarusi, ale nie znajšłosia pradpryjemstvaŭ, jakija adpaviadali b uzroŭniu čyścini, dakładnaści, jakaści i cany. «Stvareńnie nievialikich, technična ŭzbrojenych pradpryjemstvaŭ — heta siońniašniaja nieabchodnaść, — ličyć ekśpiert. — Dla taho kab raźvivać pramysłovuju kaapieracyju, nieabchodna sadziejničać stvareńniu małoha vytvorčaha biźniesu». Akramia taho, kab jany źjavilisia, nieabchodna «iści na vielmi šyrokuju restrukturyzacyju vialikich pradpryjemstvaŭ». «Tolki restrukturyzacyja dazvolić pašyryć pole pošuku, raźvivać kaapieracyju, śpiecyjalizacyju. Nieabchodna raździaržaŭleńnie, pryvatyzacyja. Pryvatnik budzie pracavać na prybytak, i budzie šukać, dzie jaho atrymać, u tym liku praz pastaŭki małych detalaŭ, małych partyj», — adznačyŭ Badziej.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?