Uviečary 26 maja ŭ muziei architektury i pobytu pad Minskam zhareŭ adzin z ekspanataŭ — draŭlanaje humno. Anton Astapovič, staršynia Biełaruskaha dobraachvotnaha tavarystva achovy pomnikaŭ historyi i kultury, jaki adpracavaŭ u muziei kala 17 hadoŭ, ličyć, što častka viny lažyć na administracyi. I ŭvohule, na jaho dumku, prablem u muzieja chapaje.

«Raniej pasty vartaŭnikoŭ byli na kožnym ekspazicyjnym siektary. A ciapier zastalisia tolki pasty na dvuch siektarach, i adzin na uvachodzie. Adzin z tych pastoŭ faktyčna znachodzicca ŭ lesie. Adtul ničoha nie vidać. Da taho ž muziej maje svajo pažarnaje depo na dźvie mašyny. Ale ja viedaju, što, kali adbyłosia ŭzharańnie, to pažarnych vyklikali nie vartaŭniki muzieja, jakija pažaru nie zaŭvažyli padčas niasieńnia słužby, a žychary susiedniaj vioski Aziarco. Čamu tak adbyłosia — pytańnie da siońniašniaj administracyi muzieja», — kaža Astapovič.

Da taho ž, ličyć Astapovič, akramia niezrazumiełaj historyi z tym zharełym humnom, administracyja ŭvohule zakinuła pracu nad abjektami draŭlanaha dojlidstva.

«Ja nie hublaju suviazi z muziejam i pa siońnia. I dakładna mahu skazać, što prablemaŭ chapaje. Źnikaje tradycyjnaja draŭlanaja architektura. Abjekty pa ŭsioj terytoryi Biełarusi adychodziać u niabyt, nichto ich nie daśleduje, nichto ich nie fiksuje. Naš rodny Minkult adchilaje prapanovy, kab najbolš jaskravym prykładam dojlidstva nadać status pomnika. A kali ŭźnikaje niejkaje prablema z pomnikam, jakaja znachodzicca ŭ kampietencyi muzieja, administracyja nie adpraŭlaje ŭ kamandziroŭku svaich supracoŭnikaŭ, a pierakidvaje hetaje pytańnie na sielsaviety, i potym nijak heta nie kantraluje, — ŭpeŭnieny Astapovič. — Jany ŭvohule ničoha nie robiać, nie zajmajucca pravierkaj stanu abjektaŭ, nie vyjaŭlajuć i nie fiksujuć novyja abjekty. A muziej — heta navukova-aśvietnaja ustanova, u statucie jaho prapisana vyjaŭleńnie, vyvučeńnie i fiksacyja abjektaŭ narodnaha dojlidstva. Hetaja rabota nie pravodzicca. Čamu? Pytańni da dyrektara. Ale prablema naŭrad ci ŭ hrošach, bo muziej u siezon niabłaha zarablaje. Kab dasłać supracoŭnika na niekalki dzion u kamandziroŭku hrošaj pavinna chapać. Dyj ekspazicyja daŭno nie papaŭniajecca. Maja viersija — sučasnaj administracyi heta prosta «pa barabanu».

Na žal, na pretenzii Antona Astapoviča dyrektar muzieja, Eduard Bahdanovič, adkazvać admoviŭsia.

«Pra pažar — na sajcie MNS infarmacyja vykładziena. Bolš ničoha dadać nie mahu», — skazaŭ jon.

Клас
0
Панылы сорам
0
Ха-ха
0
Ого
0
Сумна
0
Абуральна
0