14 maja Biełaruś była pryniataja ŭ Bałonski praces. Vypadak Biełarusi biesprecedentny — krainu ŭziali ŭ Jeŭrapiejskuju prastoru vyšejšaj adukacyi «avansam».

Biełaruś nie vypraviła tyja prablemnyja momanty, ź jakimi inšyja jeŭrapiejskija krainy razabralisia jašče da ŭstupleńnia ŭ Bałonski praces. Tamu ministry adukacyi krain JEPVA zapatrabavali ad Biełarusi harantyj vykanańnia darožnaj karty pa dałučeńni da Bałonskaha pracesu. Ciapier ža staŭ dastupny tekst darožnaj karty. Što patrabujecca ad Biełarusi?

Pa-pieršaje, heta raspracoŭka nacyjanalnaj ramki kvalifikacyj. Biełaruś musić pierajści na jeŭrapiejskuju sistemu kredytaŭ (Jeŭrapiejskuju sistemu pieravadnych zalikovych adzinak ci ECTS). Heta sistema dapamoža lohka aceńvać kolkaść materyjału, zasvojenuju studentam. Sistema ŭniviersalnaja dla ŭsioj JEPVA, a tamu možna ciaham navučańnia nabirać kredyty ŭ roznych VNU biez ryzyki niepryznańnia projdzienaha. Nacyjanalnaja kaardynacyjnaja hrupa pa raspracoŭcy sistemy kvalifikacyj musić być stvoranaja da kanca 2015 hoda, a praca nad ukaranieńniem sistemy kvalifikacyj musić raspačacca ŭ pieršaj pałovie 2016 hoda.

Ad Biełarusi patrabujecca pierajści na acenku vučebnaj nahruzki ŭ kredytach, uvieści pieršuju stupień (bakałaŭra), jakaja składaje 180-240 kredytaŭ i pastupova zhortvać 5-hadovaju stupień bakałaŭra, jakaja isnuje ciapier.

Pa-druhoje, Biełaruś maje ŭziać na siabie abaviazacielstvy pa zabieśpiačeńni pravavoj asnovy dla stvareńnia niezaležnaha ahienctva kantrolu jakaści adukacyi ŭ adpaviednaści ź Jeŭrapiejskimi standartami i instrukcyjami. Hety krok musić być zrobleny da kanca 2017 hoda.

Pa-treciaje, Biełaruś musić pryvieści svajo zakanadaŭstva ŭ adpaviednaść z patrabavańniem Lisabonskaj kanviencyi ab pryznańni kvalifikacyj (dakumientaŭ ab vyšejšaj adukacyi). Raspracavać hrafik uniasieńnia nieabchodnych źmienaŭ u zakanadaŭstva Biełarusi treba da kanca 2017 hoda.

Pa-čaćviortaje, da 2017 pavinien być raspracavany płan zabieśpiačeńnia aŭtamatyčnaj biaspłatnaj vydačy Dadatku da dypłoma u farmacie, raspracavanym Savietam Jeŭropy, Jeŭrapiejskaj kamisijaj i JUNESKA, na raspaŭsiudžanaj movie (nie na rasijskaj).

Pa-piataje, jašče adnoj zadačaj dla Biełarusi stanie raspracoŭka płanu pa zabieśpiačeńni, raźvićci i dyviersifikacyi mižnarodnaj mabilnaści vykładčykaŭ i studentaŭ. Hetyja miery buduć nakiravanyja na palahčeńnie vyjezdu i ŭjezdu ŭ Biełaruś studentaŭ i vykładčykaŭ. Praca nad nieabchodnymi źmienami ŭ sistemie adukacyi i zakanadaŭstvie maje pačacca ŭvosieni 2015 hoda, a zamacavanyja hetyja źmieny ŭ zakanadaŭstvie musiać być nie paźniej za siaredzinu 2017 hoda.

Da kanca 2016 hoda musić być pierahledžanyja krytery raźmierkavańnia studentaŭ-biudžetnikaŭ. Raźmierkavańnie musić być abmiežavana peŭnymi prafiesijami, u dačynieńni da jakich u krainie nazirajecca istotny niezadavoleny popyt.

Darožnaja karta Bałonskaha pracesu patrabuje pierahladzieć i krytery vydačy stypiendyj «z metaj zabieśpiačeńnia sacyjalnaj spraviadlivaści niezaležna ad połu, rasy, koleru skury, abmiežavanych mahčymaściaŭ, movy, relihii, palityčnych ci inšych pohladaŭ, krainy naradžeńnia, etničnaha abo sacyjalnaha pachodžańnia, prynaležnaści da nacyjanalnaj mienšaści, majomasnaha, sasłoŭnaha ci inšaha stanovišča».

Taksama Biełaruś nie abydziecca biez reformaŭ u halinie akademičnych svabod. Da siaredziny 2017 hoda Minadukacyi musić prapanavać parłamientu miery pa ŭklučeńni ŭ nacyjanalnaje zakanadaŭstva pryncypaŭ Vialikaj chartyi ŭniviersitetaŭ i rekamiendacyj Rady Jeŭropy ŭ dačynieńni da adkaznaści dziaržavy za zabieśpiačeńnie akademičnaj svabody i instytucyjnaj aŭtanomii. Taksama da hetaha času musiać być ukaranionyja źmieny, jakija zabiaśpiečvajuć studentaŭ i vykładčykaŭ pravam svabodna stvarać i rehistravać arhanizacyi.

Spravazdača ab vykanańni dadzienych patrabavańniaŭ musić być pradastaŭlenaja ŭ 2018 hodzie. Dakładnyja terminy i forma spravazdačy buduć vyznačanyja Naziralnaj hrupaj pa realizacyi Bałonskaha pracesu.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?