Upraŭleńnie Śledčaha kamiteta pa Homielskaj vobłaści zaviaršyła rasśledavańnie kryminalnaj spravy ŭ dačynieńni da vykładčyka Buda-Kašaloŭskaha dziaržaŭnaha ahrarna-techničnaha kaledža, jaki abvinavačvajecca ŭ atrymańni chabaru, paviedamili ŭ Śledčym kamitecie Biełarusi.

Śledstvam ustanoŭlena, što vykładčyk dyscypliny «Techničnaje absłuhoŭvańnie sielskahaspadarčaj techniki» ŭ pieryjad z kastryčnika 2012 hoda pa sakavik 2015 za peŭnuju płatu padrychtoŭvaŭ ad imia navučencaŭ kursavyja prajekty pa svaim pradmiecie i vystaŭlaŭ za ich stanoŭčyja adznaki ŭ adpaviednuju viedamaść, žurnał navučalnych zaniatkaŭ i knižku paśpiachovaści. Uznaharodžańnie abvinavačvany atrymlivaŭ u zamiežnaj valucie i biełaruskich rublach, a taksama prymaŭ tavarna-materyjalnyja kaštoŭnaści. Pamier chabaru składaŭ, jak praviła, $50. Akramia taho, mieli miesca fakty pieradačy vykładčyku kanistraŭ ź bienzinam i dyzielnym palivam.

Supraćpraŭnyja dziejańni fihuranta nasili sistemny charaktar. Praktyčna usie dapytanyja pa kryminalnaj spravie navučency pakazali, što viedali pra mahčymaść zamovy kursavoj pracy ŭ piedahoha. Pravaachoŭniki sabrali dokazy pa 21 epizodzie nielehalnaj dziejnaści abvinavačanaha. Na jaho majomaść, jakaja aceńvajecca ŭ Br300 młn, nakładzieny aryšt. Dziejańni vykładčyka kvalifikavanyja pa č.2 art.430 (atrymańnie chabaru) KK Biełarusi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?