U chole Liceja BDU, dzie ŭ fiłałahičnym kłasie vučyłasia 15-hadovaja Daša, staić jaje partret i kvietki.

Nahadajem, što dziaŭčynka skočyła z 12 paviercha šmatpaviarchovika ŭ staličnym rajonie Uručča, kali ŭ jaje navučalnaj ustanovie prachodziła mierapryjemstva, prymierkavanaje da Dnia nastaŭnika.

Pierad śmierciu Daša źmiaściła ŭ sacsietkach videazvarot i napisała «Ukantakcie»: «Kidajcie mnie što-niebudź na ścianu žałobnaje».

Trahiedyja ŭsich ahałomšyła. Mahčyma, licejskim piedahoham nie chapiła ličanych dzion, kab utrymać Dašu ad takoha ŭčynku.

«U licei jana advučyłasia ŭsiaho miesiac. Dziaŭčynka była razumnaja, ale zakryvałasia ad inšych, adasablałasia, drenna išła na kantakt. Psichołahi hetym zaniepakoilisia, źviarnuli ŭvahu. U paniadziełak piataha kastryčnika dziaŭčynka pavinna była sustrecca z adpaviednym śpiecyjalistam…», — raspaviadaje Jeŭraradyjo krynica ź Liceja BDU.

U navučalnaj ustanovie viedajuć niekatoryja akaličnaści, jakija dazvalajuć lepš zrazumieć dziŭnuju pieradśmiarotnuju zapisku, jakuju skłała Daša. U pryvatnaści, u dopisie skazana «Kali Vy nie ŭpeŭnienyja, što možacie dać dziciaci adekvatnyja ŭmovy žyćcia, to zrabicie abort».

«Baćka Darju nie vychoŭvaŭ. Jaje maci — urač-ankołah i šmat pracuje, — praciahvaje krynica. — Dziaŭčynka vychoŭvałasia ŭ vialikaj stupieni babulaj i dziadulem. Prytym, dziadula sam nibyta maje surjoznyja prablemy sa zdaroŭjem. Vyśvietliłasia, što prablemy byli ŭ Dašy jašče ŭ papiaredniaj škole. U pieradśmiarotnaj zapiscy skazana pra pačućci. Chutčej za ŭsio, heta adrasavana siabroŭcy M.».

U sacyjalnych sietkach znajomyja i siabry zahinułaj dziaŭčynki pišuć spačuvańni i emacyjna vykazvajuć nierazumieńnie taho, što zdaryłasia. Choć znajšlisia i takija padletki, jakija śćviardžajuć, što i raniej u Dašy była sproba pajści z žyćcia.

«Adnaho razu jaje ŭžo spyniŭ moj siabar. U hety raz jana prosta nie napisała jamu. Učora jana była viasiołaja, ale mnie zdavałasia, što joj drenna. Jana napisała mnie «byvaj». Ja nie zrazumieła spačatku. Ja była ŭ šoku. Pačała pisać siabru, jon zvaniŭ joj, ale jana telefon adklučyła…» — piša ŭ kamientarach u sacyjalnych sietkach rasijanka Hanna P., jakaja viedała Darju pa letnim łahiery.

Darečy, na staronkach siabroŭ zahinułaj dziaŭčynki ŭ sacsietkach šmat paetyčnych razvahaŭ pra suicydy.

Sama Darja, miarkujučy pa fota, žyła ŭ dobrych bytavych umovach i nie adnojčy adpačyvała za miažoj. Tym nie mienš, ad biady heta nie ŭratavała.

Upraŭleńnie Śledčaha kamiteta pa Minsku pravodzić pravierku pa fakcie śmierci dziaŭčynki.

«Śledčymi ažyćciaŭlajecca kompleks mierapryjemstvaŭ, nakiravanych na vyśviatleńnie ŭsich abstavinaŭ taho, što adbyłosia, pryčyn i ŭmoŭ, jakija sadziejničali trahiedyi. Ustaloŭvajecca kruh znosin dziaŭčynki, u tym liku, u sacyjalnych sietkach, vyvučajucca asablivaści jaje asoby. Pravodziacca nieabchodnyja ekśpiertnyja daśledavańni», — kamientujuć u SK.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?