Siaredniestatystyčny biełaruski miedyk atrymaŭ u žniŭni na ruki mienš za $300. Adnak nie ŭsie rabotniki śfiery achovy zdaroŭja pierabivajucca ad zarobku da zarobku. U lesie za Nacyjanalnaj biblijatekaj ministr Vasil Žarko dabudoŭvaje vializny katedž. Ad cikaŭnych haściej budoŭla adharodžanaja płotam z kalučym drotam.
«Tapas» — novy lidar rynku
Za apošnija hady staličny budaŭničy rynak istotna źmianiŭsia. Pa-pieršaje, značna źmienšyłasia kolkaść novabudoŭlaŭ. U hetym vinavaty i kryzis, i žyllovaja palityka ŭładaŭ, jakija ŭsio ž pryjšli da vysnovy, što Minsk nie humovy.
Pa-druhoje, dziaržava faktyčna «vymyła» z rynku drobnych pryvatnikaŭ, jakija nie mieli ŭłasnych budaŭničych mahutnaściej. Tyja najmali dla pracaŭ dziaržaŭnyja budaŭničyja tresty, pakidajučy sabie prybytak. Na płyvu zastalisia adzinkavyja hulcy, haspadary jakich zmahli adstajać svoj status. U lidary rynku vybiłasia hrupa kampanij «Tapas».
Sakret jaje pośpiechu źviazvajuć z asobaj 35-hadovaha Paŭła Biełaha (№79 u rejtynhu samych upłyvovych i paśpiachovych biznesmienaŭ za 2013 hod). Jaho nazyvali namieśnikam dyrektara budaŭničaha chołdynha.
Pavieł Bieły.
Kaliści Bieły byŭ pierśpiektyŭnym chakieistam, adnak byŭ vymušany skončyć karjeru praz traŭmu śpiny. Ciapier jon — najlepšy napadajučy prezidenckaj chakiejnaj kamandy. A jahony «Tapas» siarod lidaraŭ pa kolkaści vydzielenych učastkaŭ pad budaŭnictva.
Kvatery dla blizkaha koła
«Tapas» u adzinočku zabudoŭvaje rajon za Nacyjanalnaj biblijatekaj, pobač sa Ślapianskaj vodnaj sistemaj. Pa prestyžnaści sastupaje tolki Drazdam, dzie žyvuć čynoŭniki i inšyja asoby, nabližanyja da Alaksandra Łukašenki.
Tut «Tapas» uzvodzić małapaviarchovyja žyłyja kompleksy — u kožnym domie «Akvamaryna» i «Park-Sici» pa 10—20 apartamientaŭ płoščaj kala 150 m2.
Bolšaść kvater raskupili spartsmieny (naprykład, byłyja i ciapierašnija zorki BATE Alaksandr Hleb, Jahor Filipienka i Siarhiej Kryviec) i niepubličnyja biznesmieny, adnak siarod haspadaroŭ jość i inšyja znakavyja piersony.
Naprykład, tut pasialiłasia asabistaja doktarka Łukašenki Śviatłana Kanašenka, a taksama siamja byłoha kiraŭnika prezidenckaj achovy Andreja Uciuryna. Ich kvatery kaštujuć kala $500 tysiač. Cikava, što niekalki apartamientaŭ značacca za Kiraŭnictvam spravaŭ prezidenta.
Śviatłana Kanašenka — treciaja sprava.
Andrej Uciuryn.
Katedžy za miljon
«Tapas» śpiecyjalizavaŭsia na budaŭnictvie kvater, ale ciapier uziaŭsia jašče i za katedžy. U lesie za Nacyjanalnaj biblijatekaj, pobač sa svaim ža «Park-Sici», byli arandavanyja 2,5 hiektara ziamli. Pavodle prajekta, tut musiać paŭstać 14 katedžaŭ.
«Tapas» buduje damy, padvodzić u ich śviatło, vadu i haz, a taksama vykonvaje čarnavuju adździełku. Katedžy kaštujuć ad $640 tysiač da $1,2 miljona ŭ zaležnaści ad płoščy (jana vahajecca ad 440 da 790 kvadratnych mietraŭ). Ziamla pad imi pieradajecca kupcam u arendu na stahodździe.
Dla «Tapasa» heta nadzvyčaj vyhadny prajekt. Pavodle damovy ź Minharvykankam, za arendu ziamli davodzicca płacić fiksavanyja mizernyja hrošy — kala 5 miljonaŭ rubloŭ na miesiac za ŭsiu terytoryju z učastkami.
Śpiecyjalny dazvoł Žarko
Na dadzieny momant na prodaž vystaŭlenyja piać katedžaŭ. Ci byli pradadzienyja astatnija damy i chto staŭ ich haspadarami, pakul nieviadoma.
Adnak «Naša Niva» znajšła dziŭny dakumient, datyčny adnaho z učastkaŭ u katedžnym pasiołku. Jašče ŭ listapadzie 2010 Minharvykankam pryniaŭ rašeńnie №2626/1, pavodle jakoha 15 sotak vydzialałasia ministru achovy zdaroŭja Vasilu Žarko ŭ pažyćciovaje vałodańnie z pravam pieradačy ŭ spadčynu. Terytaryjalna jahony nadzieł znachodzicca ŭnutry katedžnaha pasiołka «Tapasa», ale na papierach vyviedzieny za jahonyja miežy.
Dom Vasila Žarko.
Ci mieŭ Vasil Žarko patrebu ŭ palapšeńni žyllovych umovaŭ? Za hod da vydzialeńnia ŭčastka siamja čynoŭnika nabyła trochpakajovuju kvateru ŭ novym domie pa vulicy Pijanierskaj u Drazdach. Jaje rynkavy košt składaje kala $500 tysiač. Płošča toj kvatery — bolš za 120 m2. Pa tahačasnych narmatyvach hetaha b chapiła, kab zabiaśpiečyć žyllom minimum vaśmiarych čałaviek.
Dom na Pijanierskaj.
Pavodle bijahrafii, u siamji Žarko žonka, dačka (z mužam) i dvoje ŭnukaŭ. Adnak navat kali ministru i nie chapała b mietraŭ, atrymlivać učastak jon nie musiŭ. Pa ahulnym pravile ziamla ŭ Minsku biez praviadzieńnia aŭkcyjonaŭ vydzialajecca tolki šmatdzietnym siemjam.
Vialiki dom dla ministra
U pasiołku «Tapasa» sprajektavanyja čatyry mienšyja katedžy i dziesiać vialikich. Žarko buduje jakraz-taki vialiki. Košt takoha doma — $1,03 miljona. Nieviadoma, kolki płaciŭ za jaho štości ministr.
Ubačyć elitnuju budoŭlu zblizku składana. Zajezd u katedžny pasiołak kantraluje achova «Tapasa». Pa bakavym pierymietry budoŭla miažuje ź inšymi katedžami, vakoł jakich uźviedzieny vysoki płot. Tamu adzinaja mahčymaść padyści da doma Žarko — ź lesu. Raniej tut była vuzkaja daroha da dačy kiraŭnika Ministerstva dziaržaŭnaj biaśpieki BSSR Łaŭrencija Canavy. Ciapier les vysiakajuć, kab pašyryć darohu.
Z zadniaha boku katedža Žarko jašče niama sucelnaha płotu, zatoje nad aharodžaj naciahnuty kalučy drot.
U internecie apublikavany typavy prajekt takoha ž doma, jaki budzie i ŭ ministra. Adzinaja roźnica ŭ tym, što Žarko, mahčyma, zastaniecca biez basiejna.
Katedž dvuchpaviarchovy, ale nie kampaktna-kvadratny, a vyciahnuty. Jahonaja ahulnaja płošča pieravyšaje 640 m2.
Na pieršym paviersie budzie vialikaja zała-haścioŭnia, da jakoj prymykajuć kuchnia i kaminnaja. Ahułam heta amal 100 m2. Z kaminnaj možna pierajści ŭ kinazału i ŭ trenažorku. Niepadaloku sprajektavany i rabočy kabiniet. A voś pakoj dla «absłuhi» maleńki — usiaho 6 m2.
Na druhim paviersie možna znajści dźvie spalni i dva dziciačyja pakoi (u kožnym svoj sanvuzieł i svaja harderobnaja).
Dom Žarko ŭžo dabudoŭvajecca. Vyhladaje, što zastałosia končyć finalnaje adštukavańnie.
***
Na cyrymonii ŭznaharodžańnia konkursu «Tryumf. Hierojam sportu — 2014» — ministr sa śpiavačkaj Alaksandraj Hajduk.
Vasil Žarko
Naradziŭsia ŭ 1956 u v. Leśniki Drahičynskaha rajona. Skončyŭ Juraciškaŭskuju miedycynskuju vučelniu (1975), Minski dziaržaŭny miedycynski instytut (1984) i Akademiju kiravańnia (2008).
Pracavaŭ pamočnikam sanitarnaha doktara ŭ Ivacevičach (1977), piedyjatram Bresckaj dziciačaj abłasnoj balnicy (1984— 1985), zahadčykam adździaleńnia Drahičynskaj rajonnaj balnicy (1985—1991), doktaram-inśpiektaram, namieśnikam načalnika ŭpraŭleńnia achovy zdaroŭja Bresckaha abłvykankama (1991—2002), namieśnikam hałoŭnaha doktara dziciačaj abłasnoj balnicy (2002—2003), dyrektaram sanatoryja «Krynica» (2003), hienieralnym dyrektaram «Biełprafsajuzkurorta» (2003—2005), v.a. hienieralnaha sakratara Biełaruskaha tavarystva Čyrvonaha Kryža (2005—2006).
Z 2006 — ministr achovy zdaroŭja. Žanaty, maje dačku.
* * *
Čytajcie taksama:
Pa śladach Pastajałki. Jak Vasil Žarko zrabiŭ karjeru ministra achovy zdaroŭja
