Na svajoj pieršaj za piać hadoŭ pres-kanfierencyi eks-prezident Kyrhyzstana Kurmanbiek Bakijeŭ raspavioŭ ab svajoj viersii kryvavych padziejaŭ 7 krasavika 2010 hoda ŭ Biškieku i pra svajo žyćcio ŭ Biełarusi. Sustreča z žurnalistami prajšła z nahody prezientacyi knihi Bakijeva «Bol, luboŭ, nadzieja, moj Kyrhyzstan».

Bakijeŭ zajaviŭ, što pačaŭ pisać knihu ŭ minułym hodzie z troch pryčyn. Pa-pieršaje, bo na jaho «praciahvajucca napadki» siońniašnich kirhizskich uładaŭ. «Tak, ja zasłuhoŭvaju krytyki, ale takoha ahulnaha hańbavańnia nie zasłuhoŭvaju», — ličyć jon. Druhaja pryčyna, jakaja zaachvociła jaho vykazacca, kniha žurnalista Yryśbieka Amurzakava, u jakoj jon padkreślivaje, što nivodny z zahinułych u toj dzień, pa dadzienych balistyčnaj ekśpiertyzy, nie byŭ zastreleny sa zbroi abaroncaŭ Biełaha doma.

Pa słovach Bakijeva, jaki spasyłajecca na dadzienyja hetaj ekśpiertyzy, ranieńni ŭ zabitych byli z drobnakalibiernych vintovak, drabavikoŭ, a niekatoryja zahinuli ad kołatych ran. Treciaja pryčyna — ciapierašnija ŭłady, na dumku eks-prezidenta, prysvojvajuć sabie tyja ekanamičnyja prajekty, jakija jon pačynaŭ u svaju bytnaść kiraŭnikom Kyrhyzstana. Jon zajaviŭ, što vialikaja častka knihi pryśviečana ekanomicy, i rastłumačyŭ, što vyniki jaho kiravańnia krainaj stanoŭča adroźnivajucca ad taho, što zrabiła ciapierašniaja ŭłada.

Bakijeŭ ličyć, što «dziaržpieravarot by nie adbyŭsia biez padtrymki źniešnich sił».

Pry hetym jon admoviŭsia adkazvać na pytańnie, jakija mienavita źniešnija siły stajali za źviaržeńniem ułady, zajaviŭšy, što zdahadvajecca, ale prama kazać nie moža, bo «heta moža paškodzić šmatlikim ludziam».

Siońniašnija sudy ŭ dačynieńni da jaho, jaho prychilnikaŭ i svajakoŭ jon nazvaŭ «palityčnym zakazam».

Bakijeŭ nie škaduje, što pryniaŭ rašeńnie nie razhaniać pratesty, a pakinuć krainu: «Ja moh, jak i prezident Siryi skazać: «Ja lehitymny prezident i praciahvaju kiravać krainaj».

U hetym vypadku, ličyć Bakijeŭ, było b bolš kryvi. Jon zajaviŭ, što pryniaŭ rašeńnie pakinuć Kyrhyzstan paśla telefonnaj razmovy z Uładzimiram Pucinym.

Na pytańnie, chto zahadaŭ adkryć ahoń, Bakijeŭ zajaviŭ «z majho boku zahadu nie było».

«Pa našym zakanadaŭstvie, u vypadku napadu na Bieły dom, achova maje prava ŭžyvać zbroju biez usiakaha zahadu», — raspavioŭ jon. Razam z tym, jon padkreśliŭ, što bajavymi patronami pravaachoŭniki ŭ pratestoŭcaŭ nie stralali. Spasyłajučysia na svajho małodšaha brata, jaki zajmaŭ pasadu kiraŭnika Słužby dziaržaŭnaj achovy, Žanybieka Bakijeva, jon zajaviŭ, što spačatku ŭžyvali ślezaciečny haz, a kali jon skončyŭsia — humovyja kuli.

Jon zajaviŭ, što siarod pratestoŭcaŭ 7 krasavika było šmat pjanych i «nakołatych psichatropami», a trupy, jakija potym «prypisali jaho achovie», «pieravieźli da Biełaha domu i skłali tam, kab padstavić jaho».

«U horadzie było maradziorstva, ludzi mahli stać achviarami biesparadkaŭ», — ličyć jon. Akramia taho, jon zajaviŭ, što tyja, u kaho stralali humovymi kulami, «padali, ich vynosili, a potym jany papraŭlalisia, ale karcinka ŭ ŚMI, była takaja, jak byccam ich zastrelili abaroncy Biełaha doma». Pa słovach Bakijeva, členy časovaha ŭrada admovilisia ad mižnarodnaha rasśledavańnia, na jakim jon nastojvaŭ, «bo ŭ ich rylca ŭ puchu».

Bakijeŭ zajaviŭ, što škaduje, što «dapuściŭ čałaviečyja achviary, nie zmoh praduchilić ich». Dziaržpieravarot, pa jaho słovach, staŭ dla jaho niečakanaściu.

Jon raspavioŭ, jak načalnik słužby nacyjanalnaj biaśpieki zajšoŭ da jaho ŭ samy razhar padziej sa słovami: «Prabačcie, ja vas padvioŭ». Akramia taho, Bakijeŭ zajaviŭ, što škaduje, što ŭ svoj čas pryznačyŭ siońniašniaha prezidenta krainy Ałmaźbieka Atambajeva premjer-ministram. Jaho jon acharaktaryzavaŭ jak niepracazdolnaha, nieciahavitaha i haračnaha čałavieka.

Ścipła žyvie ŭ Drazdach pad achovaj Słužby biaśpieki prezidenta Biełarusi

Bakijeŭ raspavioŭ, što ŭ Biełarusi zajmajecca dziećmi i ŭnukami: «Heta akazałasia kłapatlivaja sprava». Dačka eks-prezidenta Kyrhyzstana vučycca ŭ 9-m kłasie minskaj himnazii: «Vydatna razmaŭlaje na biełaruskaj, ruskaj i anhlijskaj movach», — małodšy syn — u piatym kłasie. Starejšyja syny Bakijeva — Maksim i Marat — zajmajucca biźniesam. Maksim žyvie ŭ Łondanie i, nasupierak čutkam, u Minsk nie pryjazdžaŭ.

Havoračy ab svaich chobi, jon raspavioŭ, što jak i raniej, zachopleny palavańniem, adkryŭ dla siabie rybałku i zajmajecca kožny dzień sportam — minimum hadzinu pa ranicach. «Znajomlusia z prostymi ludźmi, jezdžu šmat, ciapier viedaju mientalitet biełarusaŭ», — raspavioŭ jon. Bakijeŭ nazvaŭ biełarusaŭ dobrym, adkrytym, haścinnym i adukavanym narodam. Eks-prezident Kyrhyzstana pachvaliŭ biełaruskuju achovu zdaroŭja i adukacyju.

Na pytańnie, na jakija srodki jon žyvie, zajaviŭ, što 30 hadoŭ pracavaŭ na kirujučych pasadach, dobra zarablaŭ jak dyrektar zavoda, mer horada, hubiernatar, premjer, a zatym prezident: «Niaŭžo ja nie maju srodkaŭ, kab narmalna žyć». Razam z tym, jon skazaŭ, što žyvie «ścipła» — u pasiołku Drazdy. Darečy, achoŭvaje Bakijeva słužba biaśpieki prezidenta Biełarusi.

Z Alaksandram Łukašenkam Bakijeŭ maje znosiny redka — nie žadaje «złoŭžyvać siabroŭstvam i lišni raz torhać prezidenta».

«Ale žyviom niedaloka, časam sustreniemsia — viasnoj-letam — havorym pra dziaciej, unukaŭ, pra palityku starajemsia nie razmaŭlać».

Łukašenka byŭ zachopleny, kaža Bakijeŭ, kali jaho dačka pračytała paemu na biełaruskaj movie.

Jon adznačyŭ, što adrazu skazaŭ dzieciam vučyć biełaruskuju movu: «Kali žyvieš u krainie, pavinien viedać i pavažać jaje movu».

Pavodle jaho słoŭ, jamu samomu niama nieabchodnaści havaryć pa-biełarusku, ale jon razumieje adsotkaŭ 80 navin.

Bakijeŭ nazvaŭ Biełaruś svajoj druhoj Radzimaj: «Da Biełarusi ja mocna prykipieŭ». Kažučy pra svaje płany, jon nie vyklučyŭ viartańnia ŭ Kyrhyzstan, kali tam źmienicca ŭłada, adnak budučyniu svaich dziaciej jon bačyć u našaj krainie.

Kurmanbiek Bakijeŭ nie staŭ davać acenku padziejam va Ukrainie, zaŭvažyŭšy tolki: «Chto b moh padumać, što heta moža być pamiž dvuma braterskimi narodami».

Na furšecie paśla prezientacyi knihi Kurmanbiek Bakijeŭ padniaŭ tost «za mir i spakoj» ŭ Biełarusi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?