Mužčynski chor «Unija» ŭ składzie 11 čałaviek dałučyŭsia da dziavočaha duetu «Viera&Patrycyja», kab zaśpiavać kaladny kant «Novaja navina» ŭ prajekcie «Novaje pakaleńnie na Novy hod».
Tvor «Novaja navina» źjaŭlajecca rekanstrukcyjaj z apublikavanych not etnahrafičnaha zbornika Zinaidy Mažejki «Pieśni biełaruskaha Paleśsia». Hetaja pieśnia chryścijanskaha pieryjadu raspaviadaje apakryfičny siužet pra Pannu Maryju i naradžeńnie Isusa. Pavodle žanru, heta – kaladny kant.
«U majoj siamji jaje vielmi lubiać i na Rastvo zaŭždy śpiavajuć na čatyry hałasy, bo ŭsia siamja muzyčnaja. Užo niekalki hod hetuju pieśniu na kaladnych viečarynach vykonvajuć i dziaŭčaty – Viera Sałamonik i Patrycyja Śvicina.Upieršyniu my zrabili jaje z mužčynskim choram i atrymałasia vielmi pryhožaje spałučeńnie tembraŭ i enierhietyki. Sapraŭdnaje Rastvo, asabliva zvanočki naprykancy», – kaža kiraŭnička duetu «Viera&Patrycyja» Irena Katvickaja.
Śpieŭ «Novaja navina» taksama vykonvajecca ŭ kaladnym folk-miuzykłu, dzie Patrycyja hraje Kaladu, a Viera – Kozku. Pabačyć jaho možna 26 śniežnia ŭ mienskim muziei Vańkovičaŭ.
Kiraŭnik «Unii» Kiryła Nasajeŭ raspaviadaje, što kali atrymaŭ prapanovu spałučyć u hetym śpievie dziavočy duet i jahony mužčynski chor, to pryzadumaŭsia i… admoviŭsia. «Duža roznyja styli – falkłor i akademičnyja śpievy, – kaža Kirył. – A potym my znoŭ pryzadumalisia, pierakreślili niekalki varyjantaŭ i znajšli aptymalnaje rašeńnie ŭ styli druhoj chvali biełaruskaha postmadernizmu».
U zapisie akapelnaha numaru ŭziali ŭdzieł Emil Bahdasarjan, Alaksandr Radziuk, Alaksandr Lapunoŭ, Pavał Honca, Pavał Makarevič, Andrej Saŭrycki, Alaksandr Dziumin, Andrej Piatroŭ, Dzianis Łazoŭski, Andrej Kucharenka.
Pieśnia «Novaja navina» była zapisanaja dla prajektu «Novaje pakaleńnie na Novy hod». Hukarežysior zapisu Andrej Akataŭ. Videaviersiju hetaha prajektu možna ŭbačyć u noč z 31 śniežnia 2015 na 1 studzienia 2016 hodu na telekanale «Biełsat».
Novaja navina – rodzić panna syna,
Paradziła ŭ Betlejemie Maryja jedzina,
Paradziła ŭ Betlejemie Maryja jedzina,
Na rukach trymała, reč jamu śpivała,
Sama svoim stvorycielem jaho nazyvała,
Sama svoim stvorycielem jaho nazyvała.
Luli-luli synku, luli-luli synku,
Dzie sam jedzieš – biary mianie za mamku-jedynku,
Dzie sam jedzieš – biary mianie za mamku-jedynku.
Novaja navina – rodzić panna syna,
Paradziła ŭ Betlejemie Maryja jedzina,
Paradziła ŭ Betlejemie…
Maryja jedzina.
