17-hadovaja biełaruskaja tenisistka Aryna Sabalenka (460-ja pazicyja ŭ rejtynhu WTA) stała pieramožnicaj u adzinočnym razradzie turniru ŭ Puni (Indyja) z pryzavym fondam 25 tys. dołaraŭ ZŠA.
U finalnym pajadynku Sabalenka sustrakałasia z rasijankaj Viktoryjaj Kamienskaj (361). Adna hadzina čatyry chviliny i dva sety (6:3, 6:4) spatrebilisia biełaruscy, kab z druhoj sproby stać pieramožnicaj turniru ŭ Indyi. Na minułym tydni jana stała finalistkaj anałahičnaha turniru ŭ Navi Mumbai.
U kamientaryi pres-słužbie biełaruskaj fiederacyi Sabalenka zaviła: «Nievierahodnyja adčuvańni! Chočacca jašče bolš pracavać zaraz dla dasiahnieńnia najbolš vysokich metaŭ! Padziakavać usim, chto ščyra radavaŭsia, padtrymlivaŭ mianie, chto byŭ pobač na praciahu hetych dvuch nievierahodna ciažkich dla mianie tydniaŭ, svajakoŭ, viadoma ž! A zaraz u najbližejšych płanach u mianie pieradsiezonnaja padrychtoŭka».
Heta treciaja pieramoha Sabalenki ŭ adzinočnym razradzie na turnirach ITF i pieršaja — z pryzavym fondam 25 tys. dołaraŭ ZŠA. U kancy vieraśnia — pačatku kastryčnika Sabalenka stała pieramožnicaj dvuch turniraŭ z pryzavym fondam 10 tys. dołaraŭ ZŠA.
