Kiraŭnictva adździeła adukacyi Hrodzienskaha harvykankama nie dazvoliła praviadzieńnie kaladnych sustrečaŭ u škołach horada, dzie isnuje fakultatyŭnaje vyvučeńnie polskaj movy.
Śviatočnaje łamańnie apłatkam zabaroniena ŭ suviazi z tym, što ŭ takich sustrečach razam ź dziećmi tradycyjna ŭdzielničajuć supracoŭniki hienieralnaha konsulstva Respubliki Polšča, katalickija śviatary i pradstaŭniki pałanijnych arhanizacyj, jakija dziejničajuć na terytoryi Biełarusi.
Na dumku staršyni Hrodzienskaj haradskoj arhanizacyi niepryznavanaha ŭładami Sajuza palakaŭ Paŭła Kmiecika, rašeńnie pryniata pavodle zahadu abłasnoha ŭpraŭleńnia kamiteta dziaržaŭnaj biaśpieki, supracoŭniki jakoha ŭbačyli ŭ kaladnych sustrečach ideałahičnuju niebiaśpieku. Takija dziejańni, kakža Kmiecik, źjaŭlajucca prajavaj raspalvańnia mižnacyjanalnaj i mižkanfiesijnaj varožaści: «Heta nonsens. Idzie padzieł dziaciej. Navat i nie viedaju, jakimi pohladami kiravalisia tyja, chto zabaraniaŭ. Atrymlivajecca, jość dobraja viera, a jość kiepskaja viera. A heta nikoli nie daviadzie da dobraj spravy».
Hrodzienskija ŭłady, pačynajučy z novaha navučalnaha hoda, istotna abmiežavali fakultatyŭnaje vyvučeńnie polskaj movy ŭ ahulnaadukacyjnych škołach horada. Akramia taho, začynienaja adzinaja polskamoŭnaja hrupa ŭ dziciačym sadku №83. Mnohija nastaŭniki polskaj movy mieli razmovy z supracoŭnikami KDB, jakija pad pahrozami sprabavali zmusić piedahohaŭ admovicca ad vykładańnia polskaj movy.
