Sudździa Maskoŭskaha rajona Minska Maksim Suško 30 śniežnia aštrafavaŭ studenta Biełdziaržuniviersiteta Hleba Vajkula na 18 bazavych vieličyń (3,24 młn. rubloŭ) za ŭdzieł u niesankcyjanavanym masavym mierapryjemstvie — studenckim maršy, jaki prajšoŭ 2 śniežnia ŭ Minsku.
Maładoha čałavieka abvinavacili ŭ parušeńni ŭstanoŭlenaha paradku pikietavańnia. Zhodna z Kodeksam ab administracyjnych pravaparušeńniach, za heta pravaparušeńnie praduhledžvajecca pakarańnie ŭ vyhladzie papiaredžańnia, abo nakładańnia štrafu ŭ pamiery da 30 bazavych vieličyń, ci administracyjnaha aryštu.
Vajkul paviedamiŭ BiełaPAN, što płanuje abskardzić vierdykt u Minskim haradskim sudzie.
«Heta sudzilišča nad studentami, jakija sprabavali abaraniać svaje pravy, heta pieraśled za aktyŭnuju hramadzianskuju pazicyju i represii, jakim niama kanca», — skazaŭ Vajkul.
Jak paviedamlałasia raniej, na nastupny dzień paśla maršu studentaŭ Vajkul atrymaŭ vusnaje papiaredžańnie dekanata za propuski zaniatkaŭ. Takoje rašeńnie na pasiadžeńni pryniali členy niadaŭna stvoranaj ŭ VNU kamisii pa propuskach zaniatkaŭ.
