Kaardynatar arhkamiteta pa stvareńni partyi «Biełaruskaja chryścijanskaja demakratyja» Andrej Hajdukoŭ aštrafavany na 2 bazavyja vieličyni za raspaŭsiudžvańnie ŭlotak.

Jak paviedamlaje sajt pravaabaroncaŭ www.spring96.org, raspačatuju ŭ dačynieńni da jaho administracyjnuju spravu razhladaŭ namieśnik načalnika navapołackaj milicyi Uładzimir Bykaŭ. Aktyvist vinavatym siabie nie pryznaŭ i dokazy milicyi ličyć nieabhruntavanymi.

30 śniežnia na Hajdukova byŭ składzieny pratakoł pa č. 2 art. 21.14 KoAP (parušeńnie praviłaŭ dobraŭparadkavańnia i ŭtrymańnia nasielenych punktaŭ). Jaho abvinavacili ŭ raspaŭsiudžvańni ŭlotak ab kampanii «Za jakasnuju miedycynu».

Da materyjałaŭ spravy milicyjaniery dałučyli pakazańni «žančyny, jakaja pažadała zastacca nieviadomaj». Jana pakazała, što 15 śniežnia bačyła «chłopca, jaki rasklejvaŭ ulotki». Z haradskoha adździeła milicyi byŭ adpraŭleny zapyt kamunalščykam, ci źviartaŭsia da ich chto-niebudź pa dazvoł na raźmiaščeńnie ŭlotak na śpiecyjalnych infarmacyjnych stendach, jakija raźmieščanyja ŭ dvarach i kala padjezdaŭ žyłych damoŭ. Admoŭny adkaz u ŽES № 1 taksama prykładzieny da spravy. U im jość i jašče adzin materyjał, jaki Andrej Hajdukoŭ ličyć zusim niedarečnym — razdrukoŭka artykuła z sajta http://bchd.info, u jakim razmova išła ab tym, što 21 śniežnia ŭ Navapołacku prachodziŭ zbor podpisaŭ u miežach kampanii «Za jakasnuju miedycynu». Jakoje dačynieńnie hetaja padzieja maje da ŭlotak, Hajdukovu nie rastłumačyli.

Miesiac tamu Hajdukoŭ užo byŭ aštrafavany za toje, što 16 listapada pravodziŭ u Navapołacku pikiet, pryśviečany źnikłym palitykam. Ciapier jon sprabuje abskardzić rašeńnie Navapołackaha suda. Razhlad kasacyjnaj skarhi ŭ Viciebskim abłasnym sudzie pryznačany na 13 studzienia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?