Kolkaść paciarpiełych u avaryi na rali-marafonie «Dakar» u Arhiencinie pavialičyłasia da 10 čałaviek, paviedamlajuć infarmahienctvy.
Trahiedyja adbyłasia ŭ pieršy dzień marafonu, 2 studzienia. Kitajskaja honščyca Ho Mejlin na pavarocie nie spraviłasia z kiravańniem, i jaje aŭtamabil vylecieŭ za aharodžu, dzie znachodzilisia hledačy. Najbolš surjoznyja traŭmy atrymali mužčyna i jaho 14-hadovy syn. U liku paciarpiełych taksama ciažarnaja žančyna.
Nahadajem, u honcy ŭdzielničaje biełaruskaja kamanda «MAZ-SPORTaŭta», jakaja adpraviłasia ŭ Łacinskuju Amieryku 24 śniežnia. U hetym hodzie rali prachodzić pa terytoryi Arhienciny i Balivii. Udzielniki spabornictvaŭ finišujuć 16 studzienia ŭ arhientynskim Rasarya.
Biełaruś u rali-marafonie pradstaŭlajuć try spartyŭnyja hruzaviki — dva asnoŭnyja ekipažy i «chutkaja technička» dla akazańnia techpadtrymki padčas honki. Jak paviedamili BiełaPAN na Minskim aŭtazavodzie, kamanda stavić pierad saboj metu trapić u lik lidzirujučych ekipažaŭ. Razam z tym zadača-minimum - prajechać uvieś maršrut i ŭtrymacca ŭ pieršaj dziasiatcy. Štohod kala traciny ŭdzielnikaŭ «Dakara» nie dajazdžajuć da finišu.
