Zaviaršyłasia pravierka pa spravie minskaha fitnies-instruktara 32-hadovaj Ksienii Marhunskaj, jakaja ŭciakała ad kantraloraŭ praz akno tralejbusa. Supracoŭniki Partyzanskaha RUUS dali joj adkaz na zvarot u milicyju nakont hetaha incydentu. Pra heta paviedamiła pres-aficer rajonnaha ŭpraŭleńnia ŭnutranych spraŭ Natalla Hanusievič.
Skrynšot ź videa
Pavodle jaje infarmacyi, 6 śniežnia 2015 hoda ŭ 15.26 u apieratyŭna-dziažurnuju častku Partyzanskaha RUUS pastupiŭ zvanok ad vadziciela tralejbusa. Jana paviedamiła, što žančyna admaŭlajecca apłačvać prajezd. Prybyŭšy na prypynak «Staletava» narad milicyi na miescy zdareńnia ŭbačyŭ žančynu i dvuch kantraloraŭ. Usich troch dastavili ŭ rajupraŭleńnie, dzie ad ich byli pryniatyja zajavy.
Pa hetym fakcie supracoŭnikami milicyi praviedziena pravierka ŭ paradku Pracesualna-vykanaŭčaha KoAP. Pa jaje vynikach u dziejańniach kantraloraŭ adsutničaje skład administracyjnaha pravaparušeńnia. U dziejańniach žančyny bačycca skład administracyjnaha pravaparušeńnia, praduhledžanaha art. 18.30 KoAP (bieźbiletny prajezd).
Nahadajem, u zajavie, padadzienaj u milicyju, Marhunskaja napisała, što padčas incydentu joj byli pryčynienyja cialesnyja paškodžańni. Paśla hetaha jana źviarnułasia pa sudova-miedycynskuju ekśpiertyzu.
U intervju ONT Marhunskaja skazała: «Tak, u mianie nie było tałona, i kantralor mnie prapanavaŭ apłacić štraf. U toj momant u mianie nie było mahčymaści apłacić štraf niepasredna na miescy i ŭ hety čas. Ja prapanavała dakumient, jaki śviedčyć asobu, — pašpart, kab skłali pratakoł, i potym štraf prychodzić pa paštovym adrasie». Pavodle jaje słoŭ, i vadziciel, i kantralory vyrašyli začynić dźviery i nie vypuskać z tralejbusa.
Fitnies-instruktar, jakaja pakinuła ŭ transparcie sumku i vybirałasia z tralejbusa praz akno pad kamieraj mabilnaha telefona, pryznałasia: takoje ź joju ŭpieršyniu. Vybracca praz akno vyrašyła z pryncypu. Svoj učynak ni hieraičnymi, ni kamičnym nie ličyć. «Ni pry jakich abstavinach nichto, za vyklučeńniem upaŭnavažanych asob, a heta ŭ nas pradstaŭniki Ministerstva ŭnutranych spraŭ, nie maje prava pazbaŭlać čałavieka voli, prava vybaru», — skazała Marhunskaja. Jana źviarnuła ŭvahu na toje, što kantralory, jakija na jaje «nakinulisia», — darosłyja i mocnyja mužčyny.
