Kiraŭniku HRU Iharu Sierhunu było 58 hadoŭ. Fota Utro.ru.
U Rasii na praciahu niekalkich tydniaŭ ad nieviadomych pryčyn pamierli niekalki ŭpłyvovych śpiecsłužbistaŭ.
Pierad Novym hodam pamior namieśnik načalnika štaba pavietrana-desantnych vojskaŭ Rasii Alaksandr Šušukin. 51-hadovy hienierał-major uznačalvaŭ desantny kantynhient Rasii pry aneksii Kryma, a da taho ačolvaŭ śpiecapieracyju ŭ Asiecii. Pryčynaj śmierci abjaŭleny tromb u sercy.
A adrazu paśla Novaha hoda stała viadoma pra śmierć načalnika Hałoŭnaha raźviedvalnaha ŭpraŭleńnia Uzbrojenych sił Rasii Ihara Sierhuna. Jamu było 58 hadoŭ, i apošnija try dziesiacihodździ jon pracavaŭ u vyviedcy. Padrabiaznaja bijahrafija Sierhuna źjaŭlajecca dziaržaŭnaj tajamnicaj. HRU – zvyšsakretnaja struktura.
Možna tolki skazać, što mienavita Sierhun uznačalvaŭ sakretnyja apieracyi ŭ Danieckaj i Łuhanskaj abłaściach Ukrainy, u vyniku čaho byli stvoranyja tak zvanyja «Danieckaja i Łuhanskaja Narodnyja Respubliki». Siarod pałonnych, uziatych ukrainskaj armijaj, byli i dva bajcy, što pryznalisia ŭ svajoj słužbie ŭ HRU.
Pryčyna śmierci Sierhuna nie nazyvajecca. Nijakich viersij pakul nie padajuć i rasijskija ŚMI.
