Pry kancy minułaha hoda ŭ Minsku na praśpiekcie Dziaržynskaha, 106 adkryłasia buterbrodnaja Sub's, jakaja usim svaim afarmleńniem nahadvaje znakamituju sietku restaranaŭ Subway. Nabyvać franšyzu vielmi doraha, to ŭładalniki buterbrodnaj vyrašyli zrabić padobnuju nazvu i vykarystać padobnyja kolery.
Niadaŭna Sub's adkryŭ jašče adzin restaran pa adrasie Zacharava, 24. «Naša Niva» vyrašyła pakaštavać amierykanskija sendvičy na biełaruski ład.
Niahledziačy na «miortvy čas» dla restaranaŭ, a 16-j hadzinie ŭ buterbrodnaj siadzieła kala šaści čałaviek. Pryncyp pracy Sub's taki ž samy, jak i ŭ Subway: ty abiraješ sendvič ci źbiraješ jaho sam pa inhredyjentach. Ceny na sendvičy siarednija, kali paraŭnoŭvać z toj ža «Łaŭkaj» i «Buvette».
Buterbrodnaja štodzień robić «sendvič dnia», jaki niezaležna ad vidu i inhredyjentaŭ kaštuje 30 000. Heta vielmi pryvabna, bo na momant našaha vizitu sendvičam dnia byŭ buterbrod «Piaščotny», dzie davoli šmat usiaho było.
My vyrašyli pakaštavać sendvič «Aryhinalny» i ŭziać kavu kapučyna. Spačatku pradavačka zapytałasia, na jakoj bułcy maje hatavacca sendvič. Bułki dla sendvičaŭ piače sama buterbrodnaja ŭ śpiecyjalnaj duchoŭcy. Na vybar jość try vida chleba: bieły, šery i čorny. My ŭziali jak na malunkach — bieły.
Usio hatujecca na vačach pakupnika, tamu heta biezumoŭna plus.
Na inhredyjenty možna taksama zirnuć i prykładna acanić ich śviežaść.
Bułka razam z salami i syram była adpraŭlenaja ŭ duchavuju šafu na niekalki chvilin. Paśla hetaha pradavačka zapytałasia pra soŭsy (ich asartymient davoli vialiki, možna dadać navat niekalki) i dadatkovyja inhredyjenty, jakija jość u najaŭnaści.
U minskich buterbrodnych jość peŭnaja asablivaść. Kali ty, naprykład, dadaješ akramia ci zamiest standartnych inhredyjentaŭ inšyja — tabie daviadziecca apłočvać ich dadatkova. Tut ža, niahledziačy na indyvidualny padbor sendviča, cana nie źmianiłasia, a navat pamienšała — 40 tysiač zamiest 43-ch. U bułcy byli salami, našatkavanaja kapusta, marynavanyja ahurki, syr, i dva soŭsy — barbiekiu i syrny. Razam z kavaj kapučyna heta kaštavała 58 tysiač. Zamova była pryhatavanaja litaralna za 5 chvilin.
Soŭs trochi sapsavaŭ vyhlad razabranaha sendviča, ale źniaŭšy vierchniuju bułku, možna pabačyć, što inhredyjentaŭ było dastatkova.
Na smak usie inhredyjenty zdavalisia śviežymi. Salami było trochi vostrym, što dadavała pikantnaści, a soŭsy byli darečnymi, bo bieź ich bułka była b zanadta suchoj.
Dobry pierakus.
Kapučyna ž byŭ jak i paŭsiul, dzie jaho robiać z kavamašyn.
* * *
Z punktu hledžańnia markietynhu, Sub's pastupili niepryhoža, ckapijavaŭšy styl u znakamitaha amierykanskaha anałaha.
Ale, kali vy śpiašajeciesia i vam niama času dobra pajeści, heta dobry varyjant. Hatujuć tut chutka, kaštuje tańniej, čym u siarednim u Minsku, i ŭ pryncypie možna sabrać sendvič, ad jakoha vy nie asabliva i pataŭściejecie.
