Žanr: bijahrafičnaja drama
Režysior: Deni Bojł
U rolach: Majkł Faśbiender, Set Rohien, Džef Deniełs, Kiejt Uinślet, Majkł Stułbarh, Ketryn Uoterstan ZŠA, 122 chv.
Adznaka: 7.
U asnovie bijahrafičnaj dramy lažyć historyja žyćcia zasnavalnika Apple Styva Džobsa. Siužet hruntujecca na troch znakavych prezientacyjach kampanii, kulminacyjaj jakich staŭ 1998 hod— premjerny pakaz iMac. Jon demanstruje ŭnutranuju kuchniu Apple — pradvieśnika budučaj ličbavaj revalucyi, a taksama momanty asabistaha žyćcia Styva Džobsa — hałoŭnaha čałavieka ŭ kampanii.
Scenar filma zasnavany na knizie Uołtara Ajzieksana «Styŭ Džobs». Aaran Sorkin, scenaryst «Sacyjalnaj sietki» (stužka 2010 hoda pra Marka Cukierbierha, zasnavalnika Facebook), stvaryŭ scenar dla filma z troch častak. Jany achoplivajuć 14 hadoŭ žyćcia Styva Džobsa, źviazanych z vypuskami piersanalnych kampjutaraŭ: vychad Macintosh u 1984 hodzie, NeXT u 1988-m i iMac u 1998-m.
Padziei adbyvajucca na dźviuch placoŭkach: u restaranie (dzie ŭ Džobsa biaruć intervju) i haražy (dzie jon raspracoŭvaje svaje pradukty), ź niekalkimi fłešbekami, jakija adsyłajuć da važnych padziej bijahrafii.
Režysior filma Deni Bojł padtrymaŭ trochaktavuju strukturu filma: «Kali vy abmiažoŭvajeciesia klučavymi momantami, to možacie raskazać pra čałavieka krychu bolš». Akramia taho, jon zajaviŭ, što nie imknuŭsia zrabić Majkła Faśbiendera, vykanaŭcu hałoŭnaj roli, kopijaj Styva Džobsa: «My vykarystali padčas zdymak niekalki parykoŭ i trochi źmianili koler jaho vačej, bo ja chacieŭ, kab u jaho byŭ toj ža koler vačej, što i ŭ troch aktrys, jakija ihrali jaho dačku Lizu. Vy pavinny bačyć u joj jaho «praciah». Ale nijakaha nakładnoha hrymu».
Kansultantam stužki staŭ były biznes-partnior Džobsa Styŭ Voźniak, adnak pračytać finalnuju viersiju scenara jon admoviŭsia z etyčnych mierkavańniaŭ. Film Bojła jamu padaŭsia žyviejšym za papiaredni bajopik pra Džobsa, jaki vyjšaŭ u 2013 («Džobs», u hałoŭnaj roli Eštan Kutčer).
Adnak u amierykanskim prakacie film faktyčna pravaliŭsia. Jon akazaŭsia skiravanym na vuzkuju aŭdytoryju abaznanych fanataŭ i davoli panyłym dla šyrokaj publiki. Zatoje na fiestyvalach stvaralniki spadziajucca atrymać niekalki ŭznaharod.
