Litva zaklikaje susiednija dziaržavy nie kuplać elektraenierhiju z AES, jakija budujucca ŭ Biełarusi i Kalininhradskaj vobłaści Rasii. Litoŭski ministr enierhietyki Rokas Masiulis źviarnuŭsia da ministraŭ Łatvii, Estonii, Polščy i Finlandyi z prapanovaj abmierkavać pytańnie kupli elektraenierhii u trecich krain, jakija budujuć niebiaśpiečnyja AES.
«Treba padać vyrazny sihnał ab tym, što elektraenierhija, jakaja vypracoŭvajecca ŭ parušeńnie mižnarodnych rehłamientaŭ jadziernaj biaśpieki, biaśpieki i miždziaržaŭnaj acenki ŭździejańnia na navakolnaje asiarodździe, nie budzie pryniata ŭ Jeŭrasajuzie (ES). Tamu nieabchodna nieadkładna i padrabiazna abmierkavać hetaje pytańnie — spačatku na rehijanalnym, a potym — na ŭzroŭni ES, i pryniać rašeńni, kab zabiaśpiečyć adnolkavyja ŭmovy handlu elektraenierhijaj z hetymi krainami», — havorycca ŭ liście ministram ekanomiki i enierhietyki čatyroch krain ad 23 śniežnia.
Pa słovach ministra, atamnyja stancyi, jakija budujucca ŭ Kalininhradskaj vobłaści i ŭ Biełarusi, ujaŭlajuć pahrozy dla navakolnaha asiarodździa, akramia taho, jany stvarajuć niesumlennuju kankurencyju na rynku elektraenierhii.
«Adno pytańnie varta razhledzieć vielmi pilna: handal elektraenierhijaj z trecimi krainami z ulikam biahučaha abo płanavanaha budaŭnictva atamnych stancyj u Biełarusi i Kalininhradskim rehijonie — prosta na miažy ź ES.
Hetyja prajekty pravodziacca ŭ žyćcio ŭ adpaviednaści z roznym pa sutnaści rehulavańniem i ŭ roznych palityčnych umovach i ŭjaŭlajuć krytyčnuju pahrozu dla susiednich dziaržaŭ ES u sensie jadziernaj biaśpieki i achovy navakolnaha asiarodździa, a taksama niesumlennaj kankurencyi ŭ vytvorčaści elektraenierhii», — adznačaje R. Masiulis.
