Čaradu rašeńniaŭ ab padtrymcy halin, jakija akazalisia ŭ składanym finansavym stanoviščy, praciahnuli narmatyŭna-pravavyja akty pa padtrymcy cemientnych zavodaŭ.
Asnoŭnyja rašeńni pakul zastalisia za kadram, bo jany zaćvierdžany rasparadžeńniem prezidenta ad 24 śniežnia 2015 № 217rp «Ab adkrytych akcyjaniernych tavarystvach cemientnaj pramysłovaści», a rasparadžeńnia nie publikujucca ŭ adkrytych krynicach. Adnak u sieradu Nacyjanalny pravavy partał apublikavaŭ pastanovu ŭrada № 1113 ad 30 śniežnia 2015 h. pryniataje ŭ raźvićcio prezidenckaha rasparadžeńnia.
Urad pryniaŭ rašeńnie ab pradastaŭleńni ŭ 2015—2016 hadach harantyi ŭrada Biełarusbanku i Bielinviestbanku ŭ pahašeńni adkrytymi akcyjaniernymi tavarystvami «Biełaruski cemientny zavod», «Kryčaŭcemientnašyfier» i «Krasnasielskbudmateryjały» astatku asnoŭnaha doŭhu pa kredytach zhodna z dadatkam (havorka idzie pra kredyty na sumu bolš za 330 młn dalaraŭ tolki ŭ valucie).
Taksama harantyja raspaŭsiudžvajecca na vypłatu pracentaŭ za karystańnie hetymi kredytami, za vyklučeńniem pracentaŭ, što vypłačvajucca za košt srodkaŭ respublikanskaha biudžetu.
Ministerstvu finansaŭ daručana pieraaformić u vyznačanym paradku nazvanyja harantyi, adklikaŭšy raniejšyja harantyi ŭrada.
Da prykładu, jak raniej paviedamlałasia, madernizacyja cemientnaj haliny ŭ 2008—2013 hadach abyšłasia ŭ 1,2 młrd dalaraŭ. Pry hetym try biełaruskija cemientnyja zavody zastajucca stratnymi, uvachodziać u top-25 samych stratnych AAT krainy. Za try kvartały hetaha hoda, pa dadzienych Minfina, «Kryčaŭcemientnašyfier» atrymaŭ čystuju stratu ŭ pamiery 196,8 młrd rubloŭ, «Krasnasielskbudmateryjały» — 121,3 młrd, Biełaruski cemientny zavod — 99,4 młrd rubloŭ.
Jak raniej paviedamlałasia, u 2007—2008 hh. u razhar budaŭničaha bumu ŭ Biełarusi byŭ deficyt cemientu. Tamu ŭłady vyrašyli pavialičyć mahutnaści, madernizavaŭšy dziejnyja try zavody. Techpieraŭzbrajeńnie było častkova prafinansavana za košt resursaŭ Ekspartna-impartnaha banka Kitaja, hienpadradčykam vystupiła kitajskaja kampanija CITIC Construction. Terminy ŭviadzieńnia novych linij na cemientnych zavodach niekalki razoŭ pieranosilisia. Realizacyja maštabnaha prajekta dazvoliła pavialičyć sukupnyja mahutnaści biełaruskaj cemientnaj industryi da 9 młn ton u hod. Adnak halina pieražyvała kryzisnyja źjavy. Biełarusi stolki cemientu było nie treba, a pradukt atrymlivajecca ŭsio roŭna davoli darahim. U vyniku zavody cierpiać straty, majučy surjoznuju pazykovuju nahruzku.
Składanaja situacyja vyklikała praviedny hnieŭ Alaksandra Łukašenki — na naradzie pa prablemnych pytańniach u budaŭničaj haliny ŭ 2013 hodzie jon aburaŭsia: «Kali vy nie možacie kankuryravać na rynku sa svaim cemientam, paŭstaje pytańnie: navošta była patrebna madernizacyja? My madernizavali pradpryjemstvy, kab być kankurentazdolnymi, kab atrymać vysokaj jakaści pradukt i pradać jaho pa dobraj canie. U advarotnym vypadku, navošta hetaja madernizacyja, nana- i inšyja technałohii? I jak pradajem? Nijak!» — zajaviŭ tady kiraŭnik dziaržavy.
«Heta ŭsio pavinny zapomnić: sutnaść madernizacyi — heta nie tolki za tannyja kredyty abo na vialikija hrošy zakupić abstalavańnie i vyrabić dobruju pradukcyju. Kančatkovy vynik madernizacyi — heta vyrabić pradukt i pradać jaho. Kali hetaha nie budzie — heta patrojnaje złačynstva z našaha boku: my zahnali tudy hrošy, uziali zamiežnyja kredytnyja linii i atrymali tavar, jaki nikomu nie patrebny», — padkreślivaŭ jon.
