Biełaruś prymie ŭ 2018 hodzie IV Čempijanat śvietu siarod studentaŭ pa kańkabiežnym sporcie, paviedamiŭ siońnia na pres-kanfierencyi vice-prezident Nacyjanalnaha alimpijskaha kamiteta Biełarusi, staršynia Biełaruskaha sajuza kańkabiežcaŭ Mikałaj Anańjeŭ.

«U 2018 hodzie my prymajem čempijanat śvietu pa kańkabiežnym sporcie siarod studentaŭ, i ja pierakanany, što my dabjomsia praviadzieńnia na našaj placoŭcy i čempijanatu śvietu, pakolki naš kańkabiežny stadyjon adpaviadaje ŭsim patrabavańniam, što vystaŭlajucca siońnia da praviadzieńnia takich spabornictvaŭ», — skazaŭ Mikałaj Anańjeŭ.

Vice-prezident NAK vykazaŭ nadzieju, što pa vynikach čempijanatu Jeŭropy pa kańkabiežnym sporcie, jaki projdzie ŭ Minsku 8-10 studzienia, Mižnarodny sajuz kańkabiežcaŭ davieryć Biełarusi i praviadzieńnie bolš bujnych spabornictvaŭ, naprykład, etapaŭ kubka śvietu, dzie kolkaść udzielnikaŭ dasiahaje dvuchsot čałaviek.

Čempijanat Jeŭropy pa kańkabiežnym sporcie projdzie ŭ Minsku 8-10 studzienia ŭ kulturna-spartyŭnym kompleksie «Minsk-Arena». Hety mižnarodny spartyŭny forum pravodzicca ŭ Biełarusi ŭpieršyniu. Prestyžny turnir źbiare lepšych kańkabiežcaŭ i balelščykaŭ z 17 krain, u tym liku Hałandyi, Italii, Hiermanii, Narviehii, Rasii, Čechii. Spartyŭny honar Biełarusi davierana adstojvać viadomym spartsmienam: Marynie Zujevaj, Taćcianie Michajłavaj i Vitalu Michajłavu.

Pakolki čempijanat pravodzicca ŭ čas kaladnych śviat, u kožny spabornicki dzień u budynku vieładroma budzie arhanizavana rabota fan-zony. Usich, chto pryjdzie sačyć za baraćboj na ladovych darožkach, čakaje vialikaje siamiejnaje śviatočnaje šou: tancavalnyja i vakalnyja konkursy, kancert alternatyŭnaj muzyki, katańnie na rolikavych kańkach.

U pierapynkach pamiž zabiehami možna budzie pakaštavać stravy biełaruskaj kuchni, vypić haračy duchmiany čaj, paŭdzielničać u rozyhryšach, pasłuchać kałarytnuju biełaruskuju muzyku. Hledačoŭ čakajuć pryjemnyja pryzy i padarunki.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?