Zakanadaŭstva ŭ adnosinach da šukalnikaŭ prytułku, jakija ŭčynili złačynstva, pavinna być bolš žorstkim, ličyć kancler FRH Anhieła Merkiel.
U pryvatnaści, uciekačoŭ-pravaparušalnikaŭ nieabchodna pazbaŭlać prava na znachodžańnie ŭ Niamieččynie raniej, čym heta robicca ciapier, zajaviła Mierkiel na kanferencyi kiraŭnictva partyi CHDS u horadzie Majnc.
Pavodle kanclera, «skłałasia novaja sytuacyja, i my pavinny nanova abdumać, jak pryvieści zakanadaŭstva ŭ adpaviednaść z realnaściu, jakaja źmianiłasia». Merkiel nie ŭdakładniła, dzie pavinna prachodzić miaža ciarpimaści, ale adznačyła, što pravaparušeńni, padobnyja tym, što zdaryłasia ŭ Kiolnie, mohuć być padstavaj dla vysyłki z krainy.
Na kanferencyi kiraŭnictva CHDS abmiarkoŭvalisia nastupstvy navahodnich padziej u Kiolnie, u tym liku reforma zakanadaŭstva ŭ dačynieńni da šukalnikaŭ prytułku i ablahčeńnie mahčymaści vysyłki złačyncaŭ-zamiežnikaŭ, a taksama ŭzmacnieńnie žorstkaści pakarańnia pry niekatorych vidach złačynstvaŭ, naprykład, pry napadach na palicejskich.
U ciapierašni čas pazbaŭleńnie prava na prytułak i departacyja ź Niamieččyny mahčymyja, kali čałaviek, jaki atrymaŭ status uciekača, prysudam pazbaŭleny voli nia mienš jak na try hady. Pry bolš miakkich pakarańniach pazbaŭleńnie prytułku mahčymaje, ale nie źjaŭlajecca abaviazkovym.