Polskija pamiežniki štrafujuć biełaruskija aŭtobusy, kali tyja ŭjazdžajuć na punkt propusku z pasažyram bieź vizy — ad 3 da 5 tysiač jeŭra za kožnaha «nielehała». Heta robicca dla taho, kab aficyjny transpart nie spryjaŭ raźvićciu płyniaŭ nielehalnych mihrantaŭ.

Za apošnija hady Minski aŭtobusny park №2, jaki kursuje ŭ Varšavu, vymušany byŭ zapłacić 5-6 padobnych štrafaŭ. Kiroŭcaŭ abaviazali praviarać pašparty ŭ pasažyraŭ pierad pasadkaj i nie puskać u aŭtobus tych, u kaho niama viz.

«Štraf płacić pieravozčyk. Ciapier my ŭžo dumajem i kiroŭcaŭ pryciahvać, a raniej u sudovym paradku takaja suma spahaniałasia z pasažyra. Biełaruś ža zrabiła takija ž kroki ŭ adkaz, tolki my spahaniajem za takoje — da 200 bazavych», — raspaviadaje śpiecyjalist pa pieravozkach staličnaha aŭtaparka.

Jon dadaje, što taki zakon dziejničaje ŭ dačynieńni da našych pieravozčykaŭ i z boku Łatvii. Litva padobnaj mieraj nie karystajecca.

Pa słovach pradstaŭnicy pryvatnaj kampanii «Intaks», u ich taksama byvali vypadki, kali davodziłasia płacić štraf za hramadzian bieź vizy. U asnoŭnym heta zdarałasia z-za niaŭvažlivaści samich pasažyraŭ, a nie z-za sproby nielehalna pierasiekčy miažu.

«Ujazdžajuć u asnoŭnym tyja, u kaho viza jość, ale jana jašče nie pačała dziejničać. Naprykład, adkryli jamu vizu z zaŭtrašniaha dnia, a jon pajechaŭ siońnia. Byvaje, što pašpart praterminavany. Ale ciapier u takim vypadku my ludziej nie puskajem u aŭtobus. Ale spačatku, kali zakon tolki ŭviali i kiroŭcy nie zaŭvažali, dyk atrymlivali štrafy», — tłumačyć pradstaŭnica kampanii «Intaks».

Akramia hetaha Ministerstva ŭnutranych spraŭ Polščy płanuje adnavić poŭny pamiežny kantrol u lipieni na čas praviadzieńnia samitu NATO (8-9 lipienia) i Suśvietnych dzion moładzi (26-31 lipienia).

Siarod krainaŭ, jakija ŭvachodziać u šenhienskaje pahadnieńnie, praciahvaje dziejničać pašpartny kantrol. Siarod ich — Aŭstryja, Hiermanija, Vienhryja, Danija, Šviecyja, Narviehija. Vybaračny kantrol dziejničaje ŭ jašče bolšaj kolkaści krainaŭ pahadnieńnia, u tym liku na miežach Polščy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?