U Biełarusi budzie stvorany hramadska-kansultatyŭny saviet dla kaardynacyi dziejnaści pa abaronie dziaciej ad škodnaj infarmacyi, paviedamiła ministr infarmacyi Lilija Ananič 15 sakavika ŭ chodzie anłajn-kanfierencyi na sajcie BiełTA.

Pavodle jaje słoŭ, u Pałacie pradstaŭnikoŭ da druhoha čytańnia rychtujucca papraŭki ŭ niekatoryja zakony, jakija tyčacca abarony dziaciej ad škodnaj infarmacyi, u tym liku ŭ zakony ab srodkach masavaj infarmacyi, ab vydavieckaj spravie.

«Padrychtavany šmatpłanavy zakonaprajekt, jaki źjaŭlajecca vynikam kalektyŭnaj pracy tych, chto ŭ roznych śfierach abaviazany abaraniać infarmacyjnuju prastoru, vychoŭvać maładoje pakaleńnie i abmiažoŭvać dziaciej ad destruktyŭnaj infarmacyi. Sutnaść prapanavanych papravak — uvieści kompleks mier pa abaronie dziaciej ad infarmacyi, što nanosić škodu zdaroŭju, raźvićciu, maralnaści», — adznačyła Ananič.

«Viadoma, jość razumieńnie, što nie tolki hramadska-kansultatyŭny saviet, ale i tyja dziaržorhany, jakija brali ŭdzieł u raspracoŭcy zakonaprajekta, buduć pa svaich kirunkach adsočvać prymianieńnie i zachavańnie normaŭ zakanadaŭstva», — ličyć kiraŭnik infarmacyjnaha viedamstva.

Ananič vykazała ŭpeŭnienaść u tym, što papraŭki ŭ zakanadaŭstva «ŭ peŭnaj stupieni sistematyzujuć i dziejnaść srodkaŭ masavaj infarmacyi». U pryvatnaści, paviedamiła jana, sistematyzavać dziejnaść ŚMI dapamoža ŭzrostavaja markiroŭka infarmacyjnaj pradukcyi. Paśla ŭniasieńnia papravak u zakanadaŭstva peŭnyja źmieny pavinny być i ŭ sietcy viaščańnia. U pryniatym zakonie buduć vyrazna prapisanyja ałharytmy dziejańniaŭ, chto i jak budzie kłasifikavać infarmacyjnuju pradukcyju, a taksama kantralavać vykanańnie zakanadaŭstva.

Praduhledžvajecca, što paradak kvalifikacyi infarmacyjnaj pradukcyi, vyrablenaj na terytoryi Biełarusi, vyznačyć urad.

Raspaŭsiudžvalniki zamiežnaj pradukcyi buduć abo zahadzia ŭ svaich dahavorach z vydaŭcami prapisvać atrymańnie nakładaŭ užo markiravanaj pradukcyi, abo markiravać jaje samastojna.

«Kali havorka idzie pra knihu, to heta nie chutkaśpieły pradukt, u vydaŭca budzie dastatkova času, kab z aŭtaram vyznačycca, na kaho heta kniha raźličana. Užo siońnia praktyčna ŭ kožnaj knizie jość infarmacyja, što kniha pryznačana dla siaredniaha abo starejšaha školnaha ŭzrostu», — skazała ministr.

Miž tym, adznačyła Ananič, adnoj tolki markiroŭkaj prablemu nie vyrašyć. «Hramadstva i dziaržava biaruć zakanadaŭčy kurs na abaronu dziaciej ad uździejańnia škodnaj infarmacyi. Takaja infarmacyja nie nakiravana na farmiravańnie ŭsiebakova raźvitaj, duchoŭna i maralna stałaj asoby i, uździejničajučy na dziciačuju psichiku, moža pryvieści da niehatyŭnych nastupstvaŭ», — reziumavała jana.

Клас
0
Панылы сорам
0
Ха-ха
0
Ого
0
Сумна
0
Абуральна
0