U chutkim časie ŭ Biełarusi pavinna źjavicca pieršaje vydańnie adnoj z samych  papularnych knih XX stahodździa – znakamitych «Chronik Narnii» K.S.Ljuisa.

Arhanizatary prajekta ŭžo całkam padrychtavali vydańnie pieršaj knihi i ciapier źbirajuć hrošy praz kraŭdfandynhavuju placoŭku talaka.by niepasredna na sam druk.

Pierakład na biełaruskuju movu pieršaj z knih lehiendarnaha fentezi — «Plamieńnik čaraŭnika» — byŭ zrobleny Nadziejaj Kim ź vialikaj luboŭju da aryhinała i rodnaj movy. Vokładku stvaraŭ adzin z najlepšych biełaruskich ilustrataraŭ — Raman Sustaŭ. Dla ilustravańnia samoj knihi vykarystany aryhinalnyja malunki, zroblenyja na zamovu Kłajva Ljuisa znanaj mastačkaj Paŭlinaj Bejns.

Arhanizatary prajekta «Chroniki Narnii pa-biełarusku» Alaksiej Šein i Andrej Kim zładzili prezientacyju knihi ŭ halerei «Ŭ». Na mierapryjemstvie prysutničała novy ambasadar karaleŭstva Vialikabrytanii spadarynia Fijona Hibs, jakaja adznačyła vysokuju kaštoŭnaść knihi i važnaść stvareńnia padobnych pierakładaŭ.

Tut i nižej fota: Pavał Chadzinski i Darja Smolskaja

Tut i nižej fota: Pavał Chadzinski i Darja Smolskaja

«Chroniki Narnii» — załataja kłasika litaratury. K. S. Ljuis razam z Dž. R.R. Tołkinym (tryłohija «Uładar piarścionkaŭ») ličacca zasnavalnikami i najlepšymi pradstaŭnikami žanra fentezi.

Sieryja knih pra Narniju karystajecca vialikaj papularnaściu va ŭsim śviecie. Da 2006 hoda było pradadziena bolš za 100 miljonaŭ asobnikaŭ. I voś čarhovaj movaj, na jakoj vychodzić hetaja cudoŭnaja historyja, stanovicca biełaruskaja.

Knihu płanujecca vydać nakładam u 2000 ekzemplaraŭ. Častku nakłada płanujecca prezentavać biełaruskim škołkam. Akramia taho, da vydańnia «Chroniki Narnii. Plamieńnik čaraŭnika» budzie dadany vypusk adnajmiennaj aŭdyjoknihi ŭ ahučcy najlepšych biełaruskich akcioraŭ.

Ciapier arhanizatary prosiać padtrymać hety prajekt finansava. U zaležnaści ad sumy, achviaravanaj na vydańnie, achviaradaŭcy atrymajuć padarunki, u tym liku — samu knihu pa košcie, nižejšym, čym budzie ŭ kramach. Padtrymać vydańnie «Chronik Narnii» možna tut.

Pa dadatkovuju infarmacyju źviartajciesia, kali łaska, da arhanizataraŭ vydańnia:

Alaksiej Šein +375 29 651 2665 [email protected]

Andrej Kim +375 29 5543459 [email protected]

Клас
0
Панылы сорам
0
Ха-ха
0
Ого
0
Сумна
0
Абуральна
0