U Minsku 473 čałavieki ŭ adpaviednaści z dekretam № 3 «ab darmajedach» apaviaścili padatkovyja orhany pra toje, što jany nie ŭdzielničajuć u finansavańni dziaržvydatkaŭ, paviedamiła 16 sakavika na pres-kanfierencyi ŭ Minsku namieśnica načalnika inśpiekcyi Ministerstva pa padatkach i zborach pa horadzie Minsku Halina Hurynovič.

«Na siońniašni dzień padadziena 473 paviedamleńni. Hetym hramadzianam užo vystaŭleny zbor u pamiery 1,2 młrd. rubloŭ. Kali jany da 1 lipienia zapłaciać hety zbor, to jaho sumu možna budzie pamienšyć na 10%. Užo zbor zapłacili 166 hramadzian u pamiery 466 młn rubloŭ», — skazała Hurynovič.

Jak paviedamlałasia, dekret prezidenta № 3 «Ab papiaredžańni sacyjalnaha ŭtrymanstva» byŭ padpisany 2 krasavika 2015 hoda. Im ustanoŭleny abaviazak hramadzian Biełarusi, zamiežnych hramadzian i asob biez hramadzianstva, jakija pastajanna pražyvajuć na terytoryi krainy i nie ŭdzielničali ŭ finansavańni dziaržaŭnych raschodaŭ abo ŭdzielničali ŭ takim finansavańni mienš za 183 kalandarnyja dni ŭ minułym hodzie, vypłačvać zbor u 20 bazavych vieličyń (na siońnia heta 4 młn 200 tys. rubloŭ).

Jak patłumačyła Hurynovič, takija hramadzianie mieli prava padavać u dobraachvotnym paradku apaviaščeńnie z 1 žniŭnia 2015 hoda ab tym, što jany nie ŭdzielničali ŭ finansavańni dziaržvydatkaŭ ci ŭdzielničali, ale mienš za 183 dni za hod.

«Što tyčycca ahulnaj kolkaści hramadzian, jakija trapiać pad normy dekreta, to kazać pra heta vielmi rana. Realnuju karcinu my ŭbačym u žniŭni», — zaznačyła śpiecyjalist.

Jak paviedamlałasia, kolkaść zarehistravanych biespracoŭnych u biełaruskaj stalicy na kaniec śniežnia 2015 hoda skłała 6,8 tys. čałaviek (0,6%), Za 2015 hod uzrovień aficyjnaha biespracoŭja vyras utraja. Ekśpierty źviazvajuć rost aficyjnaha biespracoŭja sa składanaj ekanamičnaj situacyjaj, a taksama ź dziejańniem dekreta «ab darmajedach».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?