Na minułych vychadnych u Vajennaj akademii Biełarusi praviali dzień adčynienych dźviarej. Usie fakultety arhanizavali prezientacyi z mahčymaściu pamacać zbroju, pasiadzieć u kabinach zienitnych ustanovak dy samalotaŭ, pakaštavać sałdackaj kašy. Nie kožnaja VNU krainy moža zładzić takuju ž zajmalnuju ekskursiju.

Jeŭraradyjo najpierš cikavić pytańnie patryjatyčnaha vychavańnia budučych biełaruskich aficeraŭ. Pa vynikach ekskursii dobrych uražańniaŭ zastałosia bolš, čym drennych. Ale pačniom z taho, što naściarožyła.

Korpus, zalepleny rasijskimi ściažkami

Vajennaja akademija zbolšaha aformlenaja dziaržaŭnaj biełaruskaj simvolikaj. Pałac upryhožvaje vialiki płakat «Zaŝita Riespubliki Biełaruś — obiazannosť, śviaŝiennaja dla hraždan Riespubliki Biełaruś». Ale takaja karcina ŭ Akademii nie paŭsiul.

Kursanty pakazvajuć korpus «N», dzie vučacca budučyja desantniki. Usia leśvica tut aformlenaja płakatami z vyjavami hierojaŭ rasijskaj historyi. Hutarka, naprykład, pra Kutuzava, Suvorava, Skobieleva, Brusiłava i Piatra I. Usie płakaty azdoblenyja rasijskimi trykałorami. Nie budziem spyniacca na tym, što niekatoryja z nazvanych pałkavodcaŭ dy hienierałaŭ, pavodle školnaha kursu našaj historyi, byli, chutčej, antyhierojami. Chit ekspazicyi — heta saviecki maršał Žukaŭ, taksama źmieščany na płakacie z rasijskim ściaham. Napeŭna, vytvorcy partreta nie ŭličyli, što Žukaŭ padčas Druhoj suśvietnaj vajny vajavaŭ u tym liku z ułasaŭcami, jakija prysiahnuli Hitleru pad trykałoram.

Što praŭda, bolš nidzie na terytoryi Akademii padčas ekskursii takoj karciny nie nazirajem. A kursanty kažuć, što paprostu nie źviartajuć uvahi na śpiecyfiku vyviešanych płakataŭ.

Praciahvajem ekskursiju. Vykładčykam fakulteta vajennaj raźviedki, jakija robiać prezientacyju ŭ spartovaj zale, naŭprost zadajom pytańnie, ci možna davieryć im junaka, kab paśla vypusku jon byŭ sapraŭdnym aficeram-patryjotam.

«I nie zadumvaŭsia, jaki ściažok čaplać u svaim lehkaviku — biełaruski ci jaki-niebudź inšy», — udakładniajem.

«Značycca tak, naradziŭsia ja ŭ Kałomnie. Tak atrymałasia, što los zavioŭ siudy, i adsiul ja nie źjechaŭ. Vykonvaju tut svoj słužbovy abaviazak. Tak, mnie cikava, što ŭ Rasii adbyvajecca. Ale ž my za što? Za kvitniejučuju Biełaruś», — adkazvaje sivy pałkoŭnik.

«Prysiahać vypusknik budzie kamu? Biełarusi. Značycca, i słužyć jon budzie Biełarusi», — dadaje jaho nie mienš aŭtarytetny kaleha.

«A ŭvohule, śpiecyjalnaść u nas kłasnaja, ź viedańniem zamiežnych moŭ», — zakančvaje adkaz na pytańnie pałkoŭnik.

«Mnohija ŭžo nie asacyjujuć siabie z byłym SSSR i Rasijaj»

Kožny z fakultetaŭ Akademii hruntoŭna padrychtavaŭsia da dnia adčynienych dźviarej. Paŭsiul svaje śpiecyjalnaści krasamoŭna i talenavita raschvalvajuć. I składvajecca ŭražańnie, što hałoŭnaja vajskovaja VNU krainy pa ŭzroŭni adukacyi nie sastupaje inšym fłahmanskim univiersitetam.

Pałkoŭnik z avijacyjnaha fakulteta apaviadaje, jak skłalisia losy ich byłych kursantaŭ, jakija vypuścilisia 16 hadoŭ tamu i letaś sabralisia razam. Niekatoryja stali dobrymi lotčykami i praciahvajuć słužyć.

«A niekatoryja zvolnilisia z vojska, ale ŭsie pracujuć u prystojnych miescach, nichto nie padymaje šłahbaum na parkoŭcy, — zapeŭnivaje pałkoŭnik-avijatar. — Śpiecyjalisty, jakija atrymali adukacyju pa prahramavańni i radyjosistemach, pracujuć siońnia ŭ EPAM, Itransition, u mabilnych apierataraŭ. Tamu ŭzrovień našaj adukacyi — samy vysoki. Prynamsi na avijacyjnym fakultecie».

Zadajom aficeru toje ž pytańnie, što i desantnikam, pra patryjatyzm, ściažki ŭ mašynach i biełaruskuju movu.

«U našym vojsku płanamierna i hruntoŭna pravodzicca aficyjnaja biełaruskaja palityka. Niahledziačy na blizkaje i ciesnaje siabroŭstva z Rasijskaj Fiederacyjaj, u nas jość dakładnaje raździaleńnie paniaćciaŭ. Z kožnym pakaleńniem biełaruskaść macnieje. Mnohija ŭžo nie asacyjujuć siabie z byłym SSSR, tamu što vyraśli ŭ niezaležnaj krainie. Kali i sustrakajucca ludzi, jakija asacyjujuć siabie z Rasijaj — heta adzinkavyja vypadki», — ličyć pałkoŭnik-avijatar.

Datyčna biełaruskaj movy słužbovaja asoba raskazvaje pra aficeraŭ, jakija razmaŭlajuć na joj u Akademii padčas słužby.

«Adzin užo vyjšaŭ na piensiju, a druhi — małady chłopiec, u minułym hodzie abaraniŭ dysiertacyju, staŭ namieśnikam načalnika kafiedry. I mnohija kalehi heta ceniać, ja b navat skazaŭ».

Pałkoŭnik-avijatar pry hetym adznačaje, što navučańnie pa-biełarusku ŭ Akademii pakul nie viadziecca i isnuje prablema aficyjnaha pierakładu statutaŭ na nacyjanalnuju movu.

Niekatoryja inšyja vykładčyki patłumačyli, što «pytańniem rodnaj movy i histaryčnych dziejačaŭ pakul u Akademii prosta nie zanialisia».

Nahadajem, što na pačatku 2015 hoda na sajcie Minabarony vystavili ceły raździeł z hierojami, na prykładzie jakich pavinny vučycca biełaruskija sałdaty i aficery. U śpisie byli i Tadevuš Kaściuška, i Usiasłaŭ Čaradziej, i Kanstancin Astrožski. Naturalna, było šmat imionaŭ z savieckaj epochi i z časoŭ suvierenitetu. Adnak hety patryjatyčny raździeł z sajta chutka vydalili, patłumačyŭšy tym, što jon dapracoŭvajecca. Praces ciahniecca ŭžo bolš za hod.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?