Staŭka refinansavańnia ŭ Biełarusi z 1 maja budzie źnižana na 2 pracentnyja punkty da 22% hadavych, paviedamili va ŭpraŭleńni infarmacyi i hramadskich suviaziej Nacbanka.

«Praŭleńnie i kamitet pa manietarnaj palitycy Nacyjanalnaha banka 25 krasavika pryniali šerah rašeńniaŭ u halinie hrašova-kredytnaj palityki. Z 1 maja źnižajucca: staŭka refinansavańnia — z 24% da 22% hadavych, staŭki pa pastajanna dastupnych i dvuchbakovych apieracyjach padtrymki biahučaj likvidnaści bankaŭ — z 30% da 27% hadavych, staŭki pa pastajanna dastupnych apieracyjach vyklučeńnia likvidnaści bankaŭ — z 16% da 15% hadavych», — adznačyli pradstaŭniki rehulatara.

Akramia taho, z 1 červienia źmianšajecca hraničny ŭzrovień pracentnych stavak pa novych terminovych bankaŭskich układach jurydyčnych asob u nacyjanalnaj valucie, u vypadku pieravyšeńnia jakoha praduhledžvajecca pavieličeńnie reziervovych patrabavańniaŭ, — z 0,9 da 0,8 staŭki pa pastajanna dastupnych apieracyjach Nacbanka ŭ formie kredytu aviernajt. Taksama źnižajecca hraničny ŭzrovień pracentnych stavak pa kredytach, pradastaŭlenych jurydyčnym asobam u biełaruskich rublach, u vypadku pieravyšeńnia jakoha ŭzmacniajecca paradak farmiravańnia bankami reziervu na pakryćcio mahčymych strat pa śpiecyjalnych partfielach adnarodnych kredytaŭ, — z 1,1 da 1 staŭki pa pastajanna dastupnych apieracyjach Nacbanka ŭ formie kredytu aviernajt.

Jak rastłumačyli va ŭpraŭleńni, rašeńni, nakiravanyja na źnižeńnie vieličyni pieravyšeńnia naminalnymi pracentnymi staŭkami ŭzroŭniu faktyčnaj i prahnazujemaj inflacyi. Nacbank pryniaŭ «z ulikam isnujučaj faktyčnaj situacyi, acenak na bližejšuju pierśpiektyvu i analizu isnujučych ryzyk u ekanomicy i hrašova-kredytnaj śfiery».

U dalejšym rehulatar pradoŭžyć realizacyju stratehii pa źnižeńni ryzyk-premii, zakładzienaj va ŭzroŭni pracentnych stavak, z ulikam kompleksnaha analizu isnujučych makraekanamičnych ryzyk i prahnozu raźvićcia ekanomiki Biełarusi, adznačyli śpiecyjalisty.

U Nacbanku kanstatavali, što zapavoleńnie tempaŭ rostu hrašovaj masy, farmiravańnie čystaha prapanavańnia valuty na ŭnutranym valutnym rynku, narmalizacyja situacyi na depazitnym rynku abumoŭlivajuć źmianšeńnie inflacyjnaha nacisku ŭ krainie.

Śpiecyjalisty źviarnuli ŭvahu na danyja Biełstata, zhodna ź jakimi spažyvieckija ceny ŭ sakaviku biahučaha hoda vyraśli na 0,8% (ich siaredniamiesiačny pryrost za papiarednija try miesiacy skłaŭ 2%). U adnosinach da sakavika 2015 hoda spažyvieckija ceny pavialičylisia na 12,8%, bazavaja inflacyja (inflacyja za vylikam administracyjna rehulavanych cen i cen na płodaaharodninnuju pradukcyju) skłała 11,8%.

«U bližejšyja miesiacy čakajecca dalejšaje źnižeńnie tempaŭ rostu cen», — prahnazujuć pradstaŭniki rehulatara. Pry hetym, padkreślili ŭ Nacbanku, pracentnyja staŭki pa rublovych kredytach i depazitach zachoŭvajucca na vysokim dadatnym uzroŭni, u tym liku ŭ realnym vyražeńni. U sakaviku hetaha hoda staŭka pa novych rublovych kredytach skłała 33,4% hadavych, pa terminovych depazitach — 24,3% hadavych, što istotna pieravyšaje ŭzrovień inflacyi.

U Biełarusi apošni raz staŭka refinansavańnia źmianiałasia 1 krasavika. Tady jana była źnižana na 1 pracentny punkt. Da hetaha ŭ krainie staŭku refinansavańnia źmianiali tolki 9 studzienia 2015 hoda, kali jana była pavialičana na 5 pracentnych punktaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?