Dźvie viadučyja hramadskija arhanizacyi ŭ halinie achovy zdaroŭja Vialikabrytanii, u tym liku Karaleŭskaje tavarystva achovy zdaroŭja, zaklikali lehalizavać u krainie zachoŭvańnie i vykarystańnie ŭ asabistych metach ŭsie vidy narkotykaŭ.

Ekśpierty Karaleŭskaha tavarystva achovy zdaroŭja i Savieta hramadskaha achovy zdaroŭja (FPH) śćviardžajuć, što dziaržaŭnaja palityka ŭ dačynieńni da narkotykaŭ, jakaja dziejničaje ŭ Brytanii, pravaliłasia.

Jany taksama miarkujuć, što bolšaja ŭvaha pavinna nadavacca lačeńniu narkatyčnaj zaležnaści i aśviecie.

Ministerstva ŭnutranych spraŭ Brytanii vystupiła ŭ abaronu ciapierašniaj palityki, zajaviŭšy, što maštaby niemiedycynskaha ŭžyvańnia narkotykaŭ u krainie za apošnija 10 hadoŭ skaracilisia.

Jak śćviardžajecca ŭ dakładzie pad nazvaj «Novy padychod da narkotykaŭ» (Taking A New Line On Drugs), kryminalnaje pakarańnie prademanstravała svaju nieefiektyŭnaść u baraćbie z užyvańniem narkotykaŭ, bo pahroza kryminalnaha pieraśledu pavyšaje šancy ludziej pamierci ad pieradaziroŭki i moža stać pieraškodaj dla narkazaležnych, jakim patrebnaja dapamoha.

Ekśpierty abiedźviuch arhanizacyj zaklikajuć kardynalna źmianić padychod da prablemy narkamanii, zaklikajučy pryniać u Brytanii partuhalskuju sistemu, pavodle jakoj ludziam, złoŭlenym na ŭžyvańni narkotykaŭ, prapanujuć dapamohu i padtrymku, a nie pryznačajuć pakarańnie.

U toj ža čas raspaŭsiudniki i pastaŭščyki narkotykaŭ pa-raniejšamu niasuć kryminalnuju adkaznaść.

Aŭtary dakładu taksama prapanoŭvajuć uklučyć u školny kurs abaviazkovyja ŭroki pra škodu narkotykaŭ i pieradać adkaznaść za farmavańnie palityki pa hetym pytańni ad ministerstva ŭnutranych spraŭ departamientu achovy zdaroŭja.

«Zanadta doŭha źnižeńnie ŭzroŭniu spažyvańnia narkotykaŭ było samametaj brytanskaj i ahulnasuśvietnaj palityki. Pry hetym ihnarujecca toj fakt, što žorstkaje kryminalnaje pakarańnie padšturchoŭvaje ludziej, jakija majuć patrebu ŭ dapamozie, da marhinalnych słajoŭ hramadstva. Takim čynam, škoda zdaroŭju i hramadskamu dabrabytu raście, niahledziačy na ahulnaje źnižeńnie ŭzroŭniu spažyvańnia», — zajaviła prezident Karaleŭskaha tavarystva achovy zdaroŭja Šyrli Kramier.

«Pryjšoŭ čas novaha padychodu, i my pavinny pryznać, što ŭžyvańnie narkotykaŭ — prablema achovy zdaroŭja, a nie kryminalnaha prava, i što tyja, chto nielehalna ŭžyvaje narkotyki, majuć patrebu ŭ lačeńni i padtrymcy, a nie ŭ pakarańni», — padkreśliła jana.

Baranesa Moli Mičer, vystupajučy ad imia kaalicyjnaha parłamienckaj hrupy pa refarmavańni narkapalityki, pryvitała dakład.

Pavodle jaje słoŭ, ciapierašniaja sistema «stavić pa-za zakonam tych, chto ŭžyvaje niekatoryja psichatropnyja rečyvy, u toj čas jak inšyja vielmi škodnyja psichatropnyja rečyvy, uklučajučy ałkahol i tytuń, zastajucca lehalnymi».

U ministerstvie ŭnutranych spraŭ zajavili, što padychod brytanskich uładaŭ da narkotykaŭ nakiravany na praduchileńnie ich užyvańnia i padtrymku narkazaležnych pry dapamozie lačeńnia i reabilitacyi.

«U toj ža čas my pavinny spynić pastaŭku nielehalnych narkotykaŭ i pieramahčy arhanizavanuju złačynnaść, jakaja staić za narkahandlem», — skazali ŭ viedamstvie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?