Z-za pavieličeńnia koštu kantrolnych znakaŭ moža adbycca rezki rost roźničnych cen na harbatu i kavu, a taksama paharšeńnie ekanamičnaha stanovišča pastaŭščykoŭ hetych praduktaŭ. Taki prahnoz robiać u Biźnies-sajuzie pradprymalnikaŭ i najmalnikaŭ imia prafiesara Kuniaŭskaha (BSPN).

Jak paviedamili BiełaPAN u pres-słužbie arhanizacyi, da takich nastupstvaŭ moža pryvieści pastanova Minfina ad 2 maja 2016 hoda № 30 «Ab uniasieńni źmianieńniaŭ i dapaŭnieńniaŭ u pastanovu Ministerstva finansaŭ Respubliki Biełaruś ad 5 lutaha 2014 h. № 3». U adpaviednaści z dakumientam košt kantrolnych znakaŭ na harbatu i kavu pavysiŭsia ŭ 6-7 razoŭ, što najbolš prykmietna adabjecca na roźničnych cenach niedarahich hatunkaŭ. Naprykład pa adnym z papularnych hatunkaŭ harbaty siaredni rost sabiekoštu dla pakietavanaha praduktu składzie 16%, listavoha — 21%, dla mołataj kavy — 10%.

«U takoj situacyi nielha nie ŭličvać sacyjalna-palityčnyja vydatki rostu koštaŭ na spažyvieckija tavary paŭsiadzionnaha popytu va ŭmovach źnižeńnia hrašovych dachodaŭ nasielnictva. Raźliki pakazvajuć, što i pry košcie kantrolnaha znaka 500 rubloŭ dola pramych płaciažoŭ u biudžet u adpusknoj canie harbaty składała 7,5% (u tym liku mytnaja pošlina — 5,7%). Ciapier pry košcie kantrolnaha znaka ŭ 2.900 rubloŭ jana składzie 16%, a z ulikam PDK — prykładna 30%. Takim čynam, pramyja płaciažy ŭ biudžet składuć tracinu koštu pački harbaty», — adznačajuć u BSPN.

Na dumku biźnies-sajuza, rezka pahoršycca i finansava-ekanamičnaje stanovišča imparcioraŭ harbaty i kavy, bo pavialičacca vydatki arhanizacyj na zakupku kantrolnych znakaŭ. Naprykład u TAA «Enierhija» (bujny aptovy pradaviec harbaty) takija vydatki sioleta, pavodle papiarednich acenak, pavialičacca da 3,5-4 młrd. rubloŭ suprać 600 młn. u 2015 hodzie. U struktury sabiekoštu zatraty na nabyćcio i nalepku kantrolnych marak z ulikam pryciahnieńnia kredytnych resursaŭ vyrastuć z 2 da 10-12%, što «pojdzie nasupierak z ŭstanoŭkami prezidenta na skaračeńnie vydatkaŭ».

«Pakolki ŭ bolšaści subjektaŭ haspadarańnia adsutničajuć svabodnyja finansavyja resursy, paśpiešlivaje ŭviadzieńnie ŭ dziejańnie pastanovy Minfina № 30 zdolnaje zrynuć u šokavy stan mnohija kampanii, jakija zajmajucca dystrybucyjaj, až da prypynieńnia ich dziejnaści», — adznačaje BSPN.

Biźnies-sajuz prapanuje ŭradu prypynić dziejańnie pastanovy Minfina № 30 i dadatkova praanalizavać abhruntavanaść pryniaćcia hetaha narmatyŭnaha pravavoha akta.

BSPN taksama prapanuje ŭradu padumać ab admienie markiroŭki tavaraŭ kantrolnymi znakami ŭ cełym. Prajšło piać hadoŭ ad pryniaćcia ŭkaza ad 10 červienia 2011 hoda № 243 «Ab markiroŭcy tavaraŭ kantrolnymi (identyfikacyjnymi) znakami». Za hety čas Biełaruś stała členam Jeŭrazijskaha ekanamičnaha sajuza, rychtujecca ŭstupić u Suśvietnuju handlovuju arhanizacyju. U BSPN ličać, što sistema markiroŭki kantrolnymi znakami nie tolki supiarečyć pryncypam svabodnaha abaračeńnia tavaraŭ, pryniatym va ŭkazanych mižnarodnych arhanizacyjach, ale i pavialičvaje nieabhruntavanyja vydatki kamiercyjnych arhanizacyj. Heta pryvodzić da padaražańnia tavaraŭ dla nasielnictva.

List z adpaviednymi arhumientami i raźlikami BSPN nakiravaŭ u Saviet ministraŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?