Były palitviazień z Homiela Jury Rubcoŭ ŭ śniežni 2015 hoda źmianiŭ biełaruskuju kałoniju na niamiecki łahier. Nie zdoleŭšy znajści pracu ŭ svajoj krainie i adčuvajučy pastajanny presinh z boku ŭłady, Jury Rubcoŭ paprasiŭ palityčnaha prytułku ŭ Niamieččynie. «Biełaruski partyzan» daviedaŭsia, jak siońnia žyvie aktyvist, što samaje składanaje ŭ emihracyi i ci źbirajecca Rubcoŭ viarnucca kali-niebudź dadomu.

Jury Rubcoŭ: Ja rady, što padniaŭ na śmiech biełaruskuju ŭładu

Praź niekalki miesiacaŭ paśla vyzvaleńnia ź biełaruskaj kałonii były palityčny viazień Jury Rubcoŭ razam z žonkaj Jadvihaj pierajechaŭ u Niamieččynu. Pieršy čas im pryjšłosia pražyvać u łahiery dla ŭciekačoŭ, žyć u namiocie. Paźniej im dali asobny pakoj u Niurnbierhu, dzie Jury Rubcoŭ žyvie z žonkaj u čakańni rašeńnia pa pradastaŭleńni statusu ŭciekača.

— Raskažycie pra svajo žyćcio siońnia. Ź jakimi ciažkaściami sutykajeciesia? Jak naohuł adčuvajecie siabie ŭ Hiermanii? Usio ž taki inšaja kraina, inšaja kultura, inšaja mova.

— Žyćcio siońnia ŭ mianie z žonkaj davoli adnastajnaje. Ciažkaści, viadoma, jość, i ŭ asnoŭnym jany źviazany ź niaviedańniem niamieckaj movy. Niahledziačy na toje, što my chodzim na kursy, zrazumieć łohiku niamieckaj movy vielmi składana. Składana adroźnivać 200 dziejasłovaŭ, jakija pry spražeńni mianiajuć karaniovuju asnovu. Składana pryvyknuć da taho, što dziejasłoŭ pavinien być na druhim miescy, a kali ŭ skazie dva dziejasłova, to druhi pavinien być na apošnim miescy. Dla mianie heta asabliva ciažka z-za adsutnaści muzyčnaha słychu. Tym nie mienš z bolšaha pačynaju razumieć na słych, a čytajučy, razumieju ŭžo vielmi šmat, ale razmaŭlać pakul nie mahu, akramia jak asobnymi słovami.

— Čamu dla emihracyi vybrali mienavita Hiermaniju?

— Mnie vielmi chaciełasia pahladzieć pobyt hramadzian Hiermanii, pahladzieć, jak tut pracujuć.

Akramia hetaha, mnie viadoma ab budaŭnictvie Astravieckaj AES. Adsutnaść metazhodnaści budaŭnictva AES dla mianie, jaki ŭbačyŭ zialonuju enierhietyku ŭ Hiermanii, bolš čym vidavočna.

Ja žyŭ u Homieli, možna skazać, braŭ udzieł u evakuacyi čarnobylcaŭ, i vydatna razumieju, što nichto nie prymusić Łukašenku admovicca ad budaŭnictva AES. Paśla apošniaha NZ na AES, jakaja budujecca, u mianie navat milhanuła dumka, što rasijskaje kiraŭnictva naŭmysna buduje Astravieckuju AES, źbirajučysia jaje vykarystoŭvać u jakaści šantažu Jeŭropy. Łukašenka nie moža supraćstajać cisku z boku kiraŭnictva Rasiei.

— Jakija płany na budučyniu? Pracu šukajecie?

— Nakont pracy ŭ Niamieččynie ja vyśvietliŭ nastupnaje: pakul ja nie prabudu tut 15 miesiacaŭ, pracy ŭ mianie nie budzie. Vielmi mocnym udaram dla mianie staŭ toj fakt, što majo biełaruskaje paśviedčańnie kiroŭcy tut niesapraŭdnaje, pryjdziecca prachodzić kurs navučańnia i zdavać na pravy, kali mnie heta dazvolić peŭnaja słužba.

— Ci sustrakali biełarusaŭ u Hiermanii?

— Tak, jość tut ŭciekačy i ź Biełarusi. Ludzi roznyja, źjazdžajuć ź Biełarusi pa roznych pryčynach, i ni adzin ź ich nie žadaje viartacca. Na žal, šancaŭ zastacca tut i ŭ mianie nie tak užo i šmat.

— Vy emihravali razam z žonkaj. A jak daŭno bačylisia z synam i ŭnukam?

— Syn litaralna na dniach źjechaŭ ad nas. Pryjazdžaŭ da mianie na dzień naradžeńnia. Unukaŭ baču tolki na videarolikach, jakija dasyłaje mnie syn. Razryŭ z unukami pieranošu ciažka. Ale zastaŭšysia ŭ Biełarusi, ja b nie mieŭ nijakaj harantyi, što mianie nie razłučać ź siamjoj prosta praz turmu. Źviarnicie ŭvahu na situacyju z Kastusiom Žukoŭskim (niezaležny žurnalist z Homiela — red.). Pratakoły składajucca praź niekalki dzion paśla zatrymańnia. Pišuć vidavočnuju chłuśniu. Bo heta vielmi lohka zrazumieć. Chiba znojdziecca ŭ Biełarusi čałaviek, jaki, znachodziačysia ŭ adździaleńni milicyi, pačaŭ by bojku z tryma supracoŭnikami milicyi? Adnak mienavita ŭ hetym pryznali vinavatym Kastusia Žukoŭskaha, i tak zvany sud pryznaŭ jaho vinavatym u hetym parušeńni.

U apošnija miesiacy majho znachodžańnia ŭ Biełarusi mnie niehałosna robiać bolš žorstkimi ŭmovy prafiłaktyčnaha nahladu, nie dajučy nijakich piśmovych patrabavańniaŭ.

Tak, ja pamyliŭsia, ludziej paśla vybaraŭ nie stali aryštoŭvać i sadžać u turmy. Ułada znajšła lepšaje dla siabie vyjście — štrafy. Ja ŭpeŭnieny, što na pracu ŭ Homieli ja nie zmoh by ŭładkavacca, a z čaho mnie płacić štrafy?

Akramia hetaha, maja žonka adkryta mnie skazała, što nievynosna žyć, kožny dzień čakajučy aryštu, i potym šukać, dzie ja znachodžusia. I ja razumieju i svaju žonku, i syna, jaki niekalki razoŭ bačyŭ sačeńnie za mnoj.

— Vašy akcyi ŭ Biełarusi byli śmiełymi i zadzirlivymi. Ale praz heta vam daviałosia emihravać, a režym tak i nie paŭ. Pa skančeńni času nie škadujecie pra heta?

— Nie i jašče raz nie. Ja nie zaklikaŭ, nie zaklikaju i nie budu zaklikać da siłavoha źviaržeńnia hetaj złačynnaj ułady. Ja kazaŭ, kažu i budu kazać, što rečy treba nazyvać svaimi imionami, kazać prosta toje, što ličyš patrebnym.

Ludzi nie rušyli ŭśled za maim prykładam, nie nadzieli takija majki (z nadpisam «Łukašenka — sychodź» — red.). Što tut možna zrabić, kryŭdzicca na ludziej? Ni ŭ jakim razie. Kožny čałaviek choča ščaślivaha žyćcia, padładžvajecca pad ciapierašnija abstaviny. Adzin baicca stracić pracu, inšy baicca źbićcia z boku supracoŭnikaŭ siłavych struktur, chtości čakaje svajoj čarhi na kvateru. Pryčyn šmat, a kali šukać hetyja pryčyny, to jany šmatkroć pavialičvajucca, a tamu kryŭdzicca na ludziej za heta nijak nielha.

Bolš za toje, ja rady, što zmoh padniać na śmiech hetuju ŭładu praz sudy. Padumać tolki, mnie prysudzili dva hady kałonii za toje, što ja nie padpisaŭ pracoŭny dahavor. Chiba heta nie śmiešna?

— Ci dumajecie ab viartańni ŭ Biełaruś u ahladnaj budučyni? Pry jakich umovach vy možacie viarnucca?

— Pakul va ŭładzie Łukašenka, chodu mnie nazad niama.

— Kali vy źjechali, to zajaŭlali pra toje, što nie źbirajeciesia admaŭlacca ad palityčnaj baraćby. Jak vy ličycie, nakolki efiektyŭna sprabavać źmianiać situacyju ŭ Biełarusi z-za miažy?

— Jość u mianie zadumki, kazać pra ich pakul rana, ale ŭpeŭnieny ŭ adnym - zmahacca treba, pry hetym imknučysia abychodzicca biez čałaviečych achviar. Mienavita dla hetaha i stvorana palityka. Viadoma, mała chto moža heta ŭśviadomić, znajści šlachi vyrašeńnia pytańniaŭ biez vyvadu ludziej na płošču, ale heta treba rabić.

Pieršym krokam realnaj baraćby z režymam pavinna stać patrabavańnie da mižnarodnych naziralnikaŭ za vybarami, kab jany nie prysutničali na biełaruskim śpiektakli pad nazvaj «Vybary». Ja zadumaŭ ździejśnić viełasipiedny prabieh ź Niurnbierha ŭ Varšavu, z haładoŭkaj, patrabujučy ad mižnarodnych naziralnikaŭ admovicca ad nazirańnia za śpiektaklem. Ale pakolki ŭ mianie niama nijakaha statusu, mnie zabaroniena pakidać 100-kiłamietrovuju zonu Niurnbierha. I tamu ŭ mianie tut ničoha nie atrymałasia. Chaciełasia b spadziavacca na toje, što mianie pačujuć i zmohuć pierakanać mižnarodnuju supolnaść nie jechać na prahlad śpiektakla «Vybary». I hetaha prahladu nie pavinna być da taho času, pakul nie budzie źmieniena vybarčaje zakanadaŭstva ŭ bok adkrytaści padliku hałasoŭ.

— Jak bačycca siońniašniaja situacyja ŭ Biełarusi zdaloku?

— Siońniašniuju situacyju ŭ Biełarusi, i palityčnuju, i ekanamičnuju, aceńvaju vielmi niehatyŭna. Ale samaje strašnaje ŭ tym, što hetaja situacyja budzie paharšacca. Hetamu jość abjektyŭnyja pryčyny. Ekanamičnyja reformy siońnia nieabchodnyja kroŭ z nosa. Ale iści na reformy dla Łukašenki aznačaje stracić uładu. Ale kolki b hrošaj Łukašenka siońnia ni dali b, efiekt ad hetaha budzie praktyčna nulavy. Tolki rynak zdolny palepšyć ekanomiku krainy. I jak by chto ni chacieŭ, narod budzie prystasoŭvacca da horšaj ekanamičnaj situacyi. Mahčymyja asobnyja akcyi pratestu, jakija buduć zamoŭčvacca uładaj albo žorstka padaŭlacca až da rasstrełu ludziej.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?