18 žniŭnia ŭ Biełaruś prybyŭ novy Apostalski Nuncyj u Respublicy Biełaruś biskup Habar Pinter. Samalot ź ijerarcham na borcie pryziamliŭsia ŭ Nacyjanalnym aeraporcie «Minsk» apoŭdni.

Pryvitać Apostalskaha Nuncyja ŭ zału čakańnia prybyli ŭsie členy Kanfierencyi Katalickich Biskupaŭ u Biełarusi na čale ź Mitrapalitam Minska-Mahiloŭskim arcybiskupam Tadevušam Kandrusievičam.

«Ja vielmi rady stupić narešcie na biełaruskuju ziamlu. Było vielmi cikava nazirać z samalota, jakaja ž pryhožaja kraina Biełaruś! U mnohim jana nahadała mnie pra Vienhryju — tak šmat paloŭ taksama i ŭ majoj krainie, — zaznačyŭ ijerarch. — Na hety momant ja na 100 pracentaŭ hatovy dla pracy na karyść Kaścioła ŭ Biełarusi, dla vašaj krainy i dla ludziej u vašaj krainie. Ale heta nie tolki zadańnie, heta jašče i radaść dla mianie».

Havoračy pra svoj pryjezd, biskup Habar Pinter adznačyŭ, što jaho pryjezd u Biełaruś bolš, čym prosta vizit:

«Heta nie tolki vizit, ja zastajusia tut. Cikava atrymałasia z farmularam, jaki mnie treba było zapoŭnić u samalocie — da jakoj daty ja tut prabudu. Zapaŭniajučy jaho, ja ničoha nie napisaŭ, tamu što zastanusia tut — spadziajusia, na doŭhi čas (uśmichajecca — zaŭv. aŭt.

Ijerarch dadaŭ, što jaho pieršapačatkovym zadańniem stanuć sustrečy ź biskupami, śviatarami, viernikami i pradstaŭnikami dziaržaŭnaj ułady

«Spačatku ja pavinien uvajści ŭ kurs spraŭ pa mnohich rečach — stanovišča viernikaŭ u Kaściole, dyjałoh z Pravasłaŭnaj Carkvoj i inš. — padkreśliŭ biskup. — U pieršyja čatyry-šeść miesiacaŭ maim zadańniem stanie znajomstva z Kaściołam u Biełarusi i ludźmi tut — palitykami, biskupami, ź viernikami, śviatarami, manachiniami…

Pryblizna ŭ kastryčniku adbudziecca sustreča z prezidentam Biełarusi. Najpierš ja pavinien paznajomicca z toj realnaściu, jakaja jość u Biełarusi. Paźniej pryjduć i inšyja zadańni». 

Pryhadvajučy apošniuju sustreču sa Śviatym Ajcom Franciškam, Apostalski Nuncyj dadaŭ, što niadaŭna razmaŭlaŭ z Pantyfikam:

«Ja bačyŭsia z Papam Franciškam 13 dzion nazad i praktyčna pieršaje, ab čym zajšła havorka, heta apošni vizit Prezidenta Alaksandra Łukašenki ŭ Rym i jaho sustreča z Pantyfikam, a taksama zaprašeńnie ŭ Biełaruś.

Papa Rymski skazaŭ, što my znojdziem čas i mahčymaść dla hetaha vizita. Ja nie mahu skazać, kali ci jak, ale dumaju, što skazanaje Pantyfikam — štości pazityŭnaje dla Biełarusi».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?