Biełaruski małatabojec Ivan Cichan staŭ srebnym pryzioram Rya-2016! U finale jon kinuŭ snarad na 77,79 m.

Aproč jaho, u trojku pryzioraŭ patrapili tadžyk Dyłšod Nazaraŭ (78,68) i palak Vojciech Navicki (77,73).

Jašče adzin biełarus, Siarhiej Kałamojec, staŭ dziaviaty.

Pra Ivana Cichana napisanyja sotni artykułaŭ, ź im zroblenyja dziasiatki intervju. «Naša Niva» nahadvaje historyju žyćcia hetaha vybitnaha spartoŭca.

Druhi ŭ historyi mołata

Kidańnie mołata — adzin z redkich vidaŭ sportu, dzie suśvietny rekord trymajecca voś užo niekalki dziesiacihodździaŭ. U 1986 hodzie saviecki spartsmien Juryj Siadych špurnuŭ mołat na 86,74 mietra.

Najbližej da hetaha dasiahnieńnia Cichan padabraŭsia na čempijanacie Biełarusi ŭ 2005 hodzie. Tady ad rekorda Siadych jon adstaŭ na adzin santymietr.

Ale, aproč inšaha, kidańnie mołata — adzin z «dopinhavych» vidaŭ sportu. Vyniki spabornictvaŭ nieadnarazova pierahladajucca, bo kolišnich čempijonaŭ łoviać na dopinhu.

«U cełym hetuju niehatyŭnuju źjavu ja, viadoma, asudžaju, — kazaŭ pra dopinh Cichan. — A voś z nahody spartoŭcaŭ nie złaradničaju. Jany taksama ludzi, tolki bolš, čym inšyja, schilnyja da spakusy».

Da Rya — nie vyšej za bronzu

Na Alimpijadach spartsmiena čaściakom pieraśledavali niaŭdačy. Cichan pryjazžaŭ asnoŭnym favarytam i ŭsio nijak nie moh apraŭdać čakańniaŭ.

Sidnej-2000: da miedala nie chapiła santymietra

Lidaram zbornaj tady byŭ vieteran Ihar Astapkovič. U finale jon finišavaŭ trecim, pryčym prademanstravaŭšy adnolkavy vynik ź Cichanam — pa 79,17 mietra. Bronzavy miedal dastaŭsia vieteranu za košt lepšaha druhoha kidka. A Cichanu zastałosia kryŭdnaje čaćviortaje miesca.

Afiny-2004: dyskvalifikacyja praz vosiem hadoŭ

Na hetaj Alimpijadzie ŭ finał trapili ŭžo troje biełarusaŭ — da zhadanych Cichana i Astapkoviča dadaŭsia Vadzim Dzieviatoŭski (padčas papiarednich Hulniaŭ jon byŭ dyskvalifikavany za dopinh).

Cichan pieramoh u kvalifikacyi, a ŭ finale staŭ trecim z kidkom na 79,81 m. Adnak miedal urešcie daviałosia viarnuć.

Sprava ŭ tym, što praz vosiem hadoŭ dopinh-probu Cichana pierapravieryli i znajšli ŭ joj zabaronienyja rečyvy. Hetaksama straciŭ załaty miedal jaho supiernik ź Vienhryi.

Piekin-2008: miedal i biaskoncyja sudy

Na Hulniach u Azii na pjedestał uźnialisia i Dzieviatoŭski (srebra), i Cichan (bronza). Kab dabracca da miedala, Cichanu daviałosia kinuć mołat na 81,51 m.

…Praź niekalki miesiacaŭ u abodvuch biełarusaŭ u kryvi znajšli pavyšany ŭzrovień testasteronu. Miedali daviałosia addać.

Spartoŭcy davodzili svaju praŭdu ŭ sudach dva hady i zmahli pieramahčy — u suviazi z parušeńniami pry praviadzieńni dopinh-kantrolu. Ci byŭ nasamreč pavyšany testasteron, zastałosia nieviadoma.

Z Vadzimam Dzieviatoŭskim (źleva).

Z Vadzimam Dzieviatoŭskim (źleva).

Łondan-2012: źniali za dzień da vystupleńnia

Cichan jechaŭ na Alimpijadu ŭ jakaści lidara siezonu, ale pryniać udzieł u spabornictvach nie zmoh. «Dapamahła» pierapravierka dopinh-proby za Afiny. Cichan atrymaŭ dyskvalifikacyju.

Niekatoryja mierkavali, što heta była pomsta z boku Mižnarodnaha alimpijskaha kamiteta.

Pamiž Alimpijadami spartoviec paśpieŭ stać čempijonam śvietu ŭ 2003, 2005 i 2007 hadach. Praŭda, miedal za 2005 hod daviałosia viarnuć, bo Cichana złavili na dopinhu.

Nianaviść palaka

Biełarusy i palaki vystupajuć u kidańni mołata tradycyjna mocna. I adnosiny pamiž spartsmienami susiednich krain dalokija ad ciepłyni.

Palaki Pavieł Fajdek (u centry, čempijon śvietu 2013 i 2015 hadoŭ) i Vojciech Navicki (sprava) na duch nie pieranosiać Cichana.

«Niahledziačy na haniebnaje minułaje, Cichan praciahvaje ŭdzielničać i budzie nam pieraškadžać. <…> Samaje drennaje — heta jaho pavodziny. Kali admysłova ŭžyvaješ dopinh, robiš heta na praciahu mnohich hadoŭ, to pryjazdžajučy na spabornictvy, pavinien inakš pavodzić siabie. A jon što? Ščyra vitajecca, abdymajecca… Ja jamu ruki nie padaŭ», — aburaŭsia Fajdek.

U 2015 hodzie palaki navat nie dapuścili Cichana da turnira ŭ Ščecinie, kudy papiarednie zaprasili jaho!

«My vyrašyli, što budzie lepš dla ŭsich, kali Cichan nie budzie ŭdzielničać na turniry. Bo byvajuć roznyja vypadki, kali spartoŭcy sutykajucca z dopinham i jaho prymianieńniem. Ale samaje strašnaje, kali heta adbyvajecca na Alimpijadzie. Tam, dzie spartsmieny pretendujuć na vysokaje zvańnie Alimpijskaha čempijona. Tak što takich, jak Cichan, treba izalavać ad startaŭ», — zajaviŭ polski dvuchrazovy alimpijski čempijon u šturchańni jadra Tomaš Majeŭski, jaki staŭ inicyjataram samasuda.

Varta ŭsio ž udakładnić, što nivodzin ź pieraličanych vyšej palakaŭ na dopinhu ni razu nie traplaŭsia.

Padčas Rya-2016 Pavieł Fajdek, jaki ličyŭsia adnym z favarytaŭ, siensacyjna vylecieŭ u kvalifikacyi.

«Fajdek jašče małady. Moža, heta jaho mierkavańnie, a moža, chtości naviazaŭ. Ja ni ŭ jakim razie nie asudžaju, navat dumki takoj nie ŭźnikała. Narmalny chłopiec, tym bolš palak — naš susied. U jaho ŭsio napieradzie, nie vyklučana, jašče źmienić staŭleńnie da dadzienaj situacyi», — pabłažliva prakamientavaŭ situacyju Cichan.

Miascovy deputat

Vadzim Dzieviatoŭski, partnior Cichana pa małatabojnaj zbornaj Biełarusi, sioleta pieraabirajecca ŭ pałatu pradstaŭnikoŭ.

Robić pieršyja kroki ŭ biełaruskaj palitycy i sam Cichan. U 2007 hodzie jaho zapisali ŭ inicyjatyŭnuju hrupu pa stvareńni «Biełaj Rusi».

A ŭ 2014 hodzie Cichan bałatavaŭsia ŭ Hrodzienski abłasny saviet deputataŭ. Jon vyłučaŭsia kandydatam jak namieśnik staršyni Hrodzienskaj abłasnoj struktury «Dynama», a paśla pieramohi staŭ padpisvacca jak instruktar pa śpiecyjalnaj padrychtoŭcy vajskovaj čaści №5448.

Žonka — rasijskaja spartoŭka

Budučy čempijon naradziŭsia ŭ vioscy Hłoŭsievičy Słonimskaha rajona — heta niekalki kiłamietraŭ ad Žyrovičaŭ. Darečy, Cichan — aktyŭny viernik.

U baćkoŭ, Niny Ivanaŭny i Ryhora Mikadzimaviča, byli try dački i adzin syn. U Ivanie ŭbačyli pierśpiektyŭnaha biehuna. Adnak kali Cichan imkliva nabraŭ vahu, jaho addali ŭ kidańnie mołata.

«Vyhlad — vidać za viarstu, što nie staličny žychar. U razmovie praskokvaje dyjalekt. Pryjazdžaju da baćkoŭ — zusim na inšaj movie havaru. Časam, razmaŭlajučy sa spartoŭcami-rasiejcami, chočacca ŭkrucić biełaruskaje słoŭca: niachaj narod pałamaje hałavu, što ja takoha skazaŭ», — raskazvaŭ pra siabie spartsmien.

Jaho žonka — ruskaja, jana niekali taksama była lehkaatletkaj. Volha Tarantajeva (ciapier Cichan) zajmałasia kidańniem dyska, ale skončyła karjeru na moładzievym uzroŭni.

U siamji dvoje dziaciej. Synu Ivanu 13 hadoŭ, a dačka Viera sioleta pojdzie ŭ pieršy kłas.

Pavodle infarmacyi hrodzienskaj presy, Cichany žyvuć u adnym sa spalnych rajonaŭ Hrodna i budujuć katedž na atrymanym učastku ŭ Kałožskim parku.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?