Kampanija pa vybarach deputataŭ parłamienta Biełarusi prachodzić pa bolšaj častcy niezaŭvažna, a bolšaść rekamiendacyj nie vykanana, havorycca ŭ pramiežkavaj spravazdačy naziralnaj misii Biuro pa demakratyčnych standartach i pravach čałavieka (BDIPČ) ABSIE, apublikavanaj 31 žniŭnia.

Aŭtary dakumienta padkreślili, što ahitacyjnyja mierapryjemstvy, za jakimi nazirali členy misii BDIPČ ABSIE, vybarščyki naviedvajuć słaba.

Naziralnaj misii hetaj arhanizacyi viadoma ab tym, što ŭ vybarkamy, sudy i ŭ adras miascovych uładaŭ było nakiravana 408 zvarotaŭ i skarhaŭ, jakija pieravažna tyčacca pracesu rehistracyi kandydataŭ u deputaty, a taksama farmiravańnia abo dziejnaści vybarčych kamisij. Bolšaść ź ich adchilili.

Apisvajučy palityčnaje pole Biełarusi, aŭtary spravazdačy adznačyli, što «rola palityčnych partyj słabaja i, niahledziačy na zajavy, z 2000 hoda ni adnu novuju partyju nie zarehistravali». Pa vynikach apošnich parłamienckich vybaraŭ tolki piać deputataŭ pradstaŭlajuć palityčnyja partyi, u pryvatnaści try Kamunistyčnuju partyju Biełarusi, pa adnym — Respublikanskuju partyju pracy i spraviadlivaści i Ahrarnuju partyju.

Kažučy pra vybarčuju sistemu, aŭtary dakumienta adznačyli, što ŭ hetym hodzie Centrvybarkam svaimi pastanovami, vypracavanymi na asnovie niekatorych rekamiendacyj BDIPČ ABSIE, unios šerah novaŭviadzieńniaŭ, u pryvatnaści pradpisaŭ publikavać u internecie infarmacyju ab pasiadžeńniach vybarkamaŭ, a taksama krychu pašyryŭ pravy naziralnikaŭ. U toj ža čas ceły šerah raniejšych rekamiendacyj BDIPČ ABSIE tak i nie atrymaŭ adlustravańnia ŭ zakanadaŭstvie.

Składalniki spravazdačy źviarnuli ŭvahu na toj fakt, što tolki «niaznačnaja častka asob, vyłučanych apazicyjnymi arhanizacyjami, stali členami vybarčych kamisij», u toj čas jak «kiraŭniki ci supracoŭniki miascovych orhanaŭ ułady časta źjaŭlajucca členami akruhovych vybarkamaŭ, u tym liku zajmajuć kirujučyja pazicyi».

Niekatoryja biełaruskija naziralniki paviedamili misii BDIPČ ABSIE ab tym, što im «nie było dazvolena nazirać za pracesam rehistracyi kandydataŭ, uklučajučy pravierku sapraŭdnaści podpisaŭ i dekłaracyj ab majomaści i prybytkach». Taksama joj paviedamili, što «akruhovyja vybarkamy nie dali mahčymaści vyłučanym kandydatam dla vypraŭleńnia niedakładnaściaŭ u dakumientach, u tym liku ŭ finansavych dekłaracyjach, jak toje praduhledžana zakonam».

Niekatoryja kandydaty ŭ deputaty, havorycca ŭ spravazdačy, paviedamili misii pra toje, što «pieradvybarčaja ahitacyja dazvolena tolki ŭ peŭnych miescach, niahledziačy na instrukcyi CVK pra bolš dazvolny padychod da vyznačeńnia placovak».

«Pieradvybarnaja ahitacyja prachodzić u asnoŭnym niezaŭvažna, ź nizkaj naviedvalnaściu naziranych mierapryjemstvaŭ, — adznačajecca ŭ dakumiencie. — Niekatoryja kandydaty pakazali vielmi nizki ŭzrovień ŭpeŭnienaści ŭ vybarčym pracesie i zaŭvažyli, što ich udzieł naceleny na vykarystańnie mahčymaściaŭ, jakija niedastupnyja ŭ inšych vypadkach. Niekatoryja surazmoŭcy MNV BDIPČ/ABSIE adznačyli, što niadaŭnija aryšty i sudovy pieraśled mierkavanych udzielnikaŭ pratestaŭ padčas vybarčaj kampanii ŭ śniežni 2010 hoda, a taksama mierkavanaja zdymka pracesu zboru podpisaŭ i ahitacyjnych mierapryjemstvaŭ vykarystoŭvajucca dla zapałochvańnia kandydataŭ i vybarščykaŭ».

Varta adznačyć, što napiaredadni publikacyi spravazdačy, 30 žniŭnia, śpiecyjalny kaardynatar misii karotkaterminovych naziralnikaŭ ABSIE, namieśnik staršyni Parłamienckaj asamblei ABSIE Kient Charsted i kiraŭnik misii BDIPČ ABSIE Tana de Zułujeta sustrelisia z Alaksandram Łukašenkam, jaki zajaviŭ, što vybary nie pavinny destabilizavać stanovišča ŭ krainie.

«My nie chočam, kab vybary destabilizavali stanovišča ŭ krainie. Dziakuj bohu, apošnija vybary ŭ nas da hetaha nie pryviali, i ja budu rabić usio, kab tak nie zdaryłasia i paśla hetych parłamienckich vybaraŭ», — skazaŭ Łukašenka. Pavodle słoŭ kiraŭnika dziaržavy, jaho rola ŭ vybarčym pracesie jak prezidenta zaklučajecca ŭ tym, kab zabiaśpiečyć dakładnaje i biezdakornaje vykanańnie zakonaŭ i ŭsiaho zakanadaŭstva Biełarusi ab vybarach zhodna z Kanstytucyjaj.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?