U chodzie navučalnych zaniatkaŭ na čabarkulskim palihonie Čelabinskaj vobłaści zatanuŭ tank T-72, paviedamlaje newsru.com.
vpk-news.ru
Kamandzir i navodčyk vyratavalisia, a kiroŭca-miechanik tanka pravioŭ čatyry dni ŭ komie i pieražyŭ kliničnuju śmierć. Śledstva padazraje, što tankisty sami zalili tank vadoj. Incydent adbyŭsia 23 žniŭnia, ale paviedamili pra jaho tolki ŭ čaćvier, 15 vieraśnia. Pra incydent infarmacyjnamu ahienctvu raspavioŭ kiraŭnik pravaabarončaj arhanizacyi «U vajskoŭcaŭ taksama jość prava» Alaksiej Kavaloŭ.
Trahiedyja adbyłasia, kali vajennyja adpracoŭvali padvodnaje kiravańnie. U niejki momant u tank pačała pastupać vada, i bajavuju mašynu zatapiła. Kamandziru i navodčyku ŭdałosia vybracca samastojna, a miechanika-kiroŭcu dastali biez prytomnaści.
Pa słovach Alaksieja Kavalova, śledstva miarkuje, što tankisty sami adkryli luk. U toj ža čas tankisty śćviardžajuć, što vada ŭ tank pačała traplać źnizu, a luk jany adkryli, kab vybracca vonki.
Suprać dvuch vajskoŭcaŭ raspačataja kryminalnaja sprava pa č.1 art. 350 KK RF (Parušeńnie praviłaŭ kiravańnia abo ekspłuatacyi bajavoj, śpiecyjalnaj abo transpartnaj mašyny, što paciahnuła pa nieaściarožnaści pryčynieńnie ciažkaj škody zdaroŭju čałavieka).
Alaksiej Kavaloŭ śćviardžaje, što viny vajskoŭcaŭ u tym, što jany parušyli praviły kiravańnia bajavoj mašynaj, niama.
