Imaviernuju źmienu miery strymańnia dla biznesoŭca, zasnavalnika kampanii «Trajpł» Juryja Čyža, jaki ad sakavika byŭ u śledčym izalatary KDB, a 14 vieraśnia nibyta pieraviedzieny pad chatni aryšt ci padpisku ab niavyjeździe, dla Svabody prakamentavaŭ jahony raniejšy biznes-partner Uładzimier Japryncaŭ.
Japryncaŭ sam niadaŭna vyjšaŭ na volu paśla taho, jak kolišni siabra «zdaŭ» jaho orhanam, i ciapier papraŭlaje zdaroŭje ŭ sanatoryi:
— Uładzimier Hienadzievič, z roznych krynicaŭ pastupajuć źviestki, što Jury Čyž adpuščany ź izalatara KDB i dniami navat rychtujecca viarnucca na pracu…
— Ja nie cikaviŭsia, vyjšaŭ jon ci nie… Ščyra kažučy, na hetuju temu nie chaču navat ni havaryć, ni dumać. Ja ciapier u sanatoryi, zaniaty zusim inšymi prablemami. Dumak pra jaho dakładna niama…
— Litaralna dniami Alaksandar Łukašenka zajaviŭ, što Čyž vinien biudžetu 12—13 miljonaŭ dalaraŭ, jakija musić viarnuć…
— Nia viedaju pra heta, tamu nie mahu kamentavać. U mianie svajo žyćcio. A kolki kamu vinien jon — paniaćcia nia maju… Ja jahonych dziaciej i siamju lublu, a pra ŭsio astatniaje havaryć niama sensu.
— Z ulikam taho, što adbyvałasia padčas niadaŭniaha sudovaha pasiedžańnia, havorka pra adnaŭleńnie supracoŭnictva małavierahodnaja, tak razumieju?
— Vy zadajacie pytańnie i sami absalutna pravilna na jaho adkazvajecie. Tym bolš Radyjo Svaboda. Karennaje tut słova — jakraz svaboda. Nu, a kali sami padčas sudu ŭsio bačyli… Prabačcie, mnie na hetuju temu nasamreč nia vielmi pryjemna havaryć, tamu, kali možna, ja skonču, ładna?..