Zamiena korpusa reaktara na Biełaruskaj AES pryviadzie da adterminoŭki ŭvodu błoka jak minimum na paŭhoda. Pra heta zajaviŭ žurnalistam pieršy namieśnik kiraŭnika «Rasatama» Alaksandr Łakšyn u kułuarach World Nuclear Association (WNA) Symposium — 2016 u Łondanie.
«Heta adkidvaje nas jak minimum na paŭhoda, a to i bolš, nazad pa terminach uvodu błoka», — skazaŭ jon, kamientujučy situacyju z zamienaj korpusa. «Ciapier jakraz my ŭzhadniajem z zakazčykam novy hrafik, dzie i vyznačajecca, nakolki my źmiaščajem termin pusku», — dadaŭ Łakšyn. Jon rastłumačyŭ, što nijakich prablem z vybaram inšaha korpusa dla zamieny niama. «U nas zaviaršalny etap vyrabu korpusa druhoha reaktara (hetaj ža stancyi)», — nahadaŭ Łakšyn. Jon taksama adznačyŭ, što, akramia taho, jość i korpus, pryznačany dla Bałtyjskaj AES.
U dalejšym korpus pieršaha reaktara, zamianić jaki paprasiŭ biełaruski bok, moža być vykarystany dla inšych prajektaŭ. «Sam korpus pracazdolny dakładna, z punktu hledžańnia jadziernaj biaśpieki ŭ nas nijakich sumnievaŭ niama», — padkreśliŭ top-mieniedžar. «Jon moža być vykarystany na našaj placoŭcy, naprykład, na Leninhradskaj AES. My pakul jašče los hetaha korpusa detalova nie abmiarkoŭvali, ale my budujem tak šmat novych błokaŭ pa padobnych prajektach, što dakładna prymianieńnie jamu znojdziem», — skazaŭ na zakančeńnie Łakšyn.
