U Redakcyju «Našaj Nivy» źviarnulisia klijenty budaŭničaj kampanii «Drajrona» — ludzi čakajuć, kali narešcie zmohuć zasialicca ŭ svaje kvatery ŭ žyłym kompleksie ŭ Ratamcy. Adnak, pavodle apošnich dadzienych pakupnikoŭ, zamiest taho, kab zasialić žycharoŭ, užo pabudavanyja damy mohuć źnieści.
«U lutym 2015 hoda ja padpisaŭ damovu z AAT «Drajrona» na nabyćcio kvatery ŭ žyłym kompleksie pa vulicy Račnaja ŭ vioscy Ratamka Minskaha rajona. Tady na abjekcie pracy tolki pačynalisia. Kapali katłavany, budavali ścieny. Zabudoŭščyk abiacaŭ zdać pieršyja damy ŭžo ŭ vieraśni 2015 hoda. Astatnija — da novaha hoda. Ale, jak zvyčajna, zdača zaciahvałasia. Na abjekcie pry hetym uvieś čas išła praca. Budučyja žychary nazirali, i turbavacca ŭ ich nie było nijakich padstaŭ, — raspavioŭ «Našaj Nivie» Michaś Čaropka, adzin z klijentaŭ «Drajrony». — Pieršaja čarha damoŭ i sapraŭdy była całkam hatovaja ŭžo da vosieni 2015, i patrochu možna było pačynać rabić ramont. Apošnija damy vyjšli na stadyju poŭnaj hatoŭnaści ŭžo viasnoj. Damy pafarbavanyja, atynkavanyja, jość śviatło, vada, haz. Zdavałasia b — zasialajsia, žyvi, haduj dziaciej na śviežym pavietry vioski. Ale nie ŭsio tak prosta…»
Terminy zdačy pačali zaciahvacca. Zabudoŭščyk adkazvaŭ, što finalnyja dakumienty prachodziać ci toje, ci inšaje koła ŭzhadnieńnia. Ludziej heta nie vielmi supakojvała, ale poŭnaja hatoŭnaść žylla dazvalała rabić ramont, tamu asabliva nichto nie vystupaŭ, kaža Čaropka.
Toj samy kvartał: 10 damoŭ, 240 kvater.
Ale litaralna niekalki dzion tamu zabudoŭščyk prapanavaŭ pravieści schod dalevikoŭ, kab abmierkavać «važnaje pytańnie».
«I voś što my daviedalisia pra našyja damy, dzie jość śviatło, haz, vada i navat užo paštovyja adrasy. Sa słovaŭ zabudoŭščyka: usie etapy budaŭnictva ŭzhodnienyja, jość usie dakumienty i ŭsio padpisana (jak minimum jość padpisany i ŭzhodnieny płan zabudovy). Ciapier iduć raźbiralnictvy z prakuraturaj i vykankamam nakont zakonnaści pabudovy. Pačałosia sudovaje raźbiralnictva, dzie AAT «Drajrona» pradstaviła ŭsie dazvoły. Nastupnaje pasiadžeńnie adbudziecca 27 vieraśnia.
Jak zrazumieli klijenty AAT «Drajrona», vykankam niešta «pieramudryŭ» z vydzialeńniem učastkaŭ pad budaŭnictva (na hetym miescy pavinny byli być katedžy, ale vydali dazvoł na budaŭnictva šmatpaviarchovych damoŭ). Zabudoŭščyk zaśviedčyŭ, što taki dakumient jość, ale vykankam adkazvajecca ŭ heta vieryć, — raspaviadaje Michaś Čaropka. — Taksama rajonny vykankam adrapartavaŭ abłasnomu, što ŭsio pabudavana i ŭsie małajcy, a kali pačałosia raźbiralnictva, robiać vyhlad, što ničoha nie viedajuć».
U vyniku z pakupnikoŭ vyłučyli inicyjatyŭnuju hrupu z 5 čałaviek. Jany buduć praviarać dakumienty zabudoŭščyka i składać kalektyŭny list.
Rašeńnia čakajuć amal dźvie sotni siamiej. U asnoŭnym heta maładyja ludzi, jakija vydatkavali svaje apošnija hrošy i hrošy svaich baćkoŭ na pabudovu svajho tannaha žylla ŭ pryharadzie — šmat chto nabyvaŭ kvateru ŭ Ratamcy, bo mietr kaštavaŭ tańniej, čym u stalicy (prykładna 900 dalaraŭ).
«Praź niaŭzhodnienaść i jašče jakija pryčyny ad čynoŭnikaŭ ludzi ŭžo kolki miesiacaŭ nie mohuć usialicca ŭ svaje kvatery całkam hatovaha žyllovaha kompleksa. Tut nie treba dabudoŭvać jašče 10 pavierchaŭ ci pravodzić jakuju infrastrukturu. Tut prosta patrebna dazvolić ludziam žyć u svaich kvaterach i hadavać dziaciej — budučyniu našaj krainy», — kaža Čaropka.
A 16 vieraśnia adbyŭsia jašče adzin schod žycharoŭ. Ludzi sabralisia, bo inicyjatyŭnaja hrupa atrymała niečakanyja naviny: nibyta abłvykankam vynies pastanovu ich užo pabudavanyja damy — 10 trochpaviarchovikaŭ, ahułam 240 kvater — uvohule źnieści.
Na schod pryjechaŭ i pradstaŭnik «Drajrony» Alaksiej Mirašničenka, viadučy śpiecyjalist pa markietynhu i adzin z zasnavalnikaŭ pradpryjemstva. Darečy, jon i jašče niekalki supracoŭnikaŭ «Drajrony» taksama źbiralisia žyć u hetym kompleksie.
Alaksiej Mirašničenka
Ahułam na sustreču pryjšli kala sotni patencyjnych žycharoŭ.
Spačatku svaje naviny ahučyli aktyvisty inicyjatyŭnaj hrupy. Jany raspaviali, što chadzili na pryjom u rajvykankam, dzie namieśnik staršyni Savickaja ich, miakka kažučy, ździviła.
«Papiery nijakija my nie bačyli, ale jana skazała, što damy nie mohuć pryniać, bo zabudova tut — samavolnaja. Dazvoły vykankamam davalisia, ale ž ich vyrašyli adklikać, bo «Drajrona» nie atrymała ŭsie patrebnyja ŭzhadnieńni. Taksama jana paviedamiła, što ŭ vykankamie prajšło pasiadžeńnie, na jakim vyrašyli całkam źnieści ŭvieś kvartał», — raskazali ludzi.
Pradstaŭnik «Drajrony» Alaksiej Mirašničenka paćvierdziŭ, što zabudovu pryznali samavolnaj. Ale zapeŭniŭ, što znosić damy nie buduć.
«Dakumienta ab pryniatym rašeńni niama, jon rychtujecca. Ale ja skažu tak: pravierka Hienprakuraturaj našaha pradpryjemstva pravodziłasia. I sumiesna prakuraturaj, «Drajronaj» i abłvykankamam było vyrašana, što ŭzhadnieńni buduć praviedzienyja, projduć ekśpiertyzy. A paśla — damy buduć uviedzienyja ŭ ekspłuatacyju», — supakoiŭ ludziej jon.
Kankretnyja terminy, kali možna budzie zasialicca, Mirašničenka ahučyć nie zmoh. Maŭlaŭ, i siońniašniaj situacyi nichto nie čakaŭ, tamu davajcie pakul nie zahadvać.
Da taho ž, «Drajrona» pavinna pabudavać ščyt pamiž damami i čyhunkaj i niekalki «abjektaŭ sackultbytu». Chtości z natoŭpu pacikaviŭsia — a ci jość na heta hrošy ŭ zabudoŭščyka?
Mirašničenka pryznaŭ, što srodkaŭ u «Drajrony» siońnia niama. Ale paabiacaŭ, što hrošy znojduć. Košt kvater pry hetym nie pavialičycca.
Darečy, kali chtości z dolščykaŭ choča viarnuć hrošy i admovicca ad kvatery, to, zhodna z damovaj, 10% ad sumy pakidaje sabie «Drajrona». Adnak, pryznaŭšy, što ludzi i tak naciarpielisia, Mirašničenka paviedamiŭ, što hrošy možna budzie zabrać całkam. Praŭda, tolki paśla zdačy kvater u ekspłuatacyju. A ŭ hetym jakraz i pytańnie — kali toje žyllo narešcie zdaduć.
Tak što pakul ludzi čakajuć, ci ŭsio vyrašycca narešcie na ich karyść. Praŭda, davieru da zabudoŭščyka ŭžo niašmat.
«Znoŭ fihniu niejkuju placie, bajki raskazvaje», — šaptalisia klijenty «Drajrony» padčas vystupu Mirašničenki.
Da taho ž, paŭzuć i raznastajnyja čutki. Naprykład, što na zabudoŭščyka nakłali štraf pamieram amal u paŭmiljona dalaraŭ. I kab jaho nie płacić, bo hrošaj niama, «Drajrona» pieradaść adzin z padjezdaŭ — 13 kvater — ci to abł-, ci to rajvykankamu.
«Pahladzim, ci štości sapraŭdy budzie zroblena, ci heta čarhovyja abiacanki-cacanki, — kaža Michaś Čaropka. — Budziem čakać. A što jašče zastajecca?»
