1 kastryčnika ŭ Biełarusi pačała pracavać sistema bieznajaŭnych žyllovych subsidyj, praduhledžanaja ŭkazam prezidenta ad 29 žniŭnia 2016 hoda № 322 «Ab vydzialeńni bieznajaŭnych žyllovych subsidyj».
Subsidyi dajucca ŭ vypadku, kali štomiesiačnaja suma płaty za žyllova-kamunalnyja pasłuhi ŭ miežach ustanoŭlenych norm spažyvańnia hetych pasłuh i suma kampiensacyi vydatkaŭ na elektraenierhiju, spažytuju na aśviatleńnie dapamožnych pamiaškańniaŭ i pracu abstalavańnia ŭ šmatkvaternym žyłym domie, pieravyšaje 20% siaredniamiesiačnaha sukupnaha dachodu siam`i, jakaja pražyvaje ŭ horadzie, i 15% — u sielskim nasielenym punkcie.
Ukaranieńnie sistemy naličeńnia subsidyj na asnovie pryncypu vyjaŭleńnia ažyćcioŭlena z 1 kastryčnika 2016 hoda niepracujučym piensijanieram i niepracujučym invalidam. Hramadzianam, nie achoplenym sistemaj hetaha pryncypu, vydzialeńnie subsidyj budzie ažyćciaŭlacca taksama z 1 kastryčnika 2016 hoda na asnovie zajaŭnaha pryncypu.
Pry hetym uradu daručajecca praanalizavać efiektyŭnaść padavańnia bieznajaŭnych žyllovych subsidyj pa pryncypie vyjaŭleńnia i ŭnieści va ŭstanoŭlenym paradku na razhlad prezidenta prapanovy ab mahčymym pašyreńni katehoryj hramadzian, jakim bieznajaŭnyja žyllovyja subsidyi padajucca zhodna z hetym pryncypam.
Jak paviedamiŭ raniej žurnalistam pieršy namieśnik ministra žyllova-kamunalnaj haspadarki Aleh Paskrobka, žyllovyja subsidyi budzie atrymlivać kala 10% chatnich haspadarak Biełarusi. Srodki na žyllovyja subsidyi buduć vydzialacca z artykułaŭ respublikanskaha biudžetu, jakija vyznačyć Ministerstva finansaŭ. Pry hetym jon zaznačyŭ, što nazvać sumu hetych vypłat u cełym pa krainie składana, bo pamier subsidyi dla adnoj chatniaj haspadarki zaležyć ad šmatlikich faktaraŭ, u tym liku pamieru kvatery, atrymanych dachodaŭ, jakija taksama mohuć źmianiacca.
Pry naličeńni bieznajaŭnych žyllovych subsidyj budzie ŭličvacca narmatyŭnaje spažyvańnie ŽKP. «Adpaviedna, kali ŭ čałavieka šykoŭnaja kvatera, jon pražyvaje adzin, lje vadu bieź miery, to paraŭnoŭvacca budzie nie jaho faktyčnaje spažyvańnie, a narmatyŭnaje. Dziaržava pavinna datavać tam, dzie idzie narmatyŭnaje spažyvańnie pasłuh. Usio, što čałaviek spažyvaje zvyš normy, budzie apłačvacca im samastojna», — rastłumačyŭ Paskrobka.
Jon taksama zaznačyŭ, što zhodna z pryncypam vyjaŭleńnia subsidyi buduć naličvacca na try miesiacy, pa zajaŭnym pryncypie — na šeść. «Heta daść mahčymaść nie stvarać čerhi ŭ raźlikova-daviedačnych centrach, i ludziam nie treba budzie časta chadzić pa instancyjach i źbirać daviedki», — padkreśliŭ čynoŭnik. Pieršy namieśnik ministra zaznačyŭ, što pa pryncypie vyjaŭleńnia buduć aŭtamatyčna naličvacca subsidyi piensijanieram i niepracujučym hramadzianam, jakija atrymlivajuć piensiju pa invalidnaści i ź jakimi nie žyvuć pracazdolnyja. «Takim katehoryjam hramadzian nie treba pisać zajavy i nikudy chadzić dla zboru daviedak. Jany atrymajuć apaviaščeńnie ab naličeńni subsidyj», — rastłumačyŭ pradstaŭnik ministerstva.
Pavodle jaho słoŭ, kali ź piensijanieram abo invalidam pražyvaje pracazdolny hramadzianin, to pry ŭmovach, vyznačanych va ŭkazie, i tych, jakija vyznačyć urad (dakładny pieralik dachodaŭ), možna napisać z 1 kastryčnika zajavu, sabrać nieabchodnyja dakumienty i padać ich u raźlikova-daviedačny centr. «Dakładna bieznajaŭnyja subsidyi nie buduć naličvacca tym chatnim haspadarkam, u składzie jakich jość členy, što vałodajuć bolš čym dźviuma kvaterami; kali ŭ kvatery zarehistravanyja firmy, kali pakoj abo kvatera zdajecca ŭ najom. Peŭnaja abarona ad dapamohi tym, chto nie maje patreby, budzie prysutničać», — skazaŭ Paskrobka.
Nahadajem, sistemu adrasnaj dapamohi małamajomnym słajam nasielnictva biełaruskim uładam rekamiendujuć stvaryć mižnarodnyja finansavyja arhanizacyi, jakija nastojvajuć na pavyšeńni ŭzroŭniu apłaty nasielnictvam koštu žyllova-kamunalnych pasłuh.
Ekśpierty Mižnarodnaha valutnaha fondu adznačajuć, što ŭłady Biełarusi abaviazalisia pavialičyć siaredni pakazčyk kampiensacyi vydatkaŭ na ŭsie kamunalnyja pasłuhi z 48,5% u 2015 hodzie da 100% u 2018 hodzie. Pry hetym jany dasiahnuli 58% za minuły pieryjad 2016 hoda i płanujuć vyjści na ŭzrovień 75% pa kampiensacyi vydatkaŭ u 2017 hodzie.
Pavodle źviestak MVF, taryfy na kamunalnyja pasłuhi dla biełaruskich chatnich haspadarak znachodziacca nižej za ŭzrovień poŭnaha pakryćcia vydatkaŭ i nižej za taryfy ŭ inšych anałahičnych krainach rehijonu.
