Ministerstva finansaŭ Biełarusi spadziajecca, što čarhovy tranš kredytu Jeŭrazijskaha fondu stabilizacyi i raźvićcia pastupić u krainu da kanca hoda, paviedamiŭ žurnalistam 4 listapada pieršy namieśnik ministra Maksim Jermałovič, piša BiełaPAN.
«Isnuje imaviernaść, što čarhovy tranš jeŭrazijskaha kredytu pastupić u śniežni. Prablem z pryciahnieńniem tranšaŭ jeŭrazijskaha kredytu asabista ja nie baču», — skazaŭ jon.
Zakranajučy temu pryciahnieńnia novych zapazyčańniaŭ na mižnarodnym rynku kapitału, Jermałovič kanstatavaŭ, što płany pa raźmiaščeńni jeŭraablihacyj zachoŭvajucca. «Ministerstva finansaŭ zajmałasia i zajmajecca padrychtoŭčaj pracaj pa raźmiaščeńni jeŭraablihacyj. Situacyja na rynku dosyć pryjaznaja. Pry hetym składana sprahnazavać terminy, kali adbudziecca raźmiaščeńnie novaha vypusku jeŭrabondaŭ», — dadaŭ pradstaŭnik Minfina.
Jon taksama nie vyklučyŭ pryciahnieńnia pazykovych resursaŭ na ŭnutranym rynku. «Budziem hladzieć pa situacyi na ŭnutranym rynku — novyja pazyki na ŭnutranym rynku mahčymyja, ale heta buduć nievialikija pryciahnieńni», — adznačyŭ Maksim Jermałovič.
Urad pryciahvaje novyja pazyki dla refinansavańnia zapazyčanaści pa starych daŭhach.
Raniej mierkavałasia, što novy tranš jeŭrazijskaha kredytu Biełaruś atrymaje da kanca kastryčnika. «Čarhovy tranš jeŭrazijskaha kredytu na 300 młn vydzialajecca z ulikam vykanańnia kantrolnych pakazčykaŭ zaklučanaj prahramy ź JEFSR na 1 vieraśnia, — zajaŭlaŭ 3 kastryčnika ministr finansaŭ Biełarusi Uładzimir Amaryn. — My pradstavili Jeŭrazijskamu fondu spravazdaču ab vykanańni pakazčykaŭ kredytnaj prahramy, ciapier heta pytańnie aktyŭna abmiarkoŭvajecca. Da kanca kastryčnika my pastarajemsia, kab saviet fondu rašeńnie ab vydzialeńni čarhovaha tranšu kredytu pryniaŭ».
Prahrama ab pryciahnieńni kredytu na 2 młrd dołaraŭ była padpisana Biełaruśsiu i Jeŭrazijskim fondam stabilizacyi i raźvićcia ŭ sakaviku hetaha hoda. Dla atrymańnia siami tranšaŭ kredytu biełaruskija ŭłady pavinny realizavać kompleks mier pa refarmavańni ekanomiki. Na hety momant Biełaruś atrymała dva tranšy kredytu: 500 młn dołaraŭ — u sakaviku i 300 młn dołaraŭ — u lipieni.
